清文啓蒙卷二
長白 舞 格 壽平 著述
錢塘 程明遠 佩和 校梓
ᠨᡳᡴᠠᠨ ᡤᡳᠰᡠᠨ ᡴᠠᠮᠴᡳᡥᠠ ᠮᠠᠨᠵᡠᡵᠠᡵᠠ ᡶᡳᠶᡝᠯᡝᠨ ᡳ ᡤᡳᠰᡠᠨ
兼漢滿套語
ᠮᠠᠨᠵᡠ ᠪᡳᡨᡥᡝ ᡥᡡᠯᠠᡵᠠ ᠨᡳᠶᠠᠯᠮᠠ ᠣᠴᡳ᠈ ᡠᡵᡠᠨᠠᡴᡡ ᡥᡝᡵᡤᡝᠨ ᡨᠣᠮᡝ ᡤᡝᠮᡠ ᡤᡝᡨᡠᡴᡝᠯᡝᠮᡝ ᠰᠠᠴᡳ ᠠᠴᠠᠮᠪᡳ᠈ ᠮᠠᠵᡳᡤᡝ ᡥᡝᠣᠯᡝᡩᡝᠴᡳ ᠣᠵᠣᡵᠠᡴᡡ᠈ ᠠᡳᡴᠠᠪᠠᡩᡝ ᡝᡵᡝ ᠪᡳᡨᡥᡝᡩᡝ ᡝᠵᡝᡥᡝᠩᡤᡝ ᡤᡝᡨᡠᡴᡝᠨ ᠠᡴᡡ ᠣᠴᡳ ᡤᡡᠸᠠᡳ ᠪᡳᡨᡥᡝᡩᡝ ᡨᡝᡳᠰᡠᠯᡝᠪᡠᡥᡝᡩᡝ ᡠᡨᡥᠠᡳ ᡨᡝᠩᡴᡳᠮᡝ ᠰᠠᠮᡝ ᠮᡠᡨᡝᡵᠠᡴᡡ ᠣᠮᠪᡳ᠈ ᡠᡨᡨᡠ ᠰᡝᡵᡝ ᠠᠩᡤᠠᠯᠠ᠈ ᠶᠠᠶᠠ ᠨᡳᠶᠠᠯᠮᠠ ᡩᡝ ᠪᡝᠯᡤᡝ ᡳ ᡤᡝᠰᡝ ᡝᡵᡩᡝᠮᡠ ᠪᡳᠴᡳ᠈ ᠪᡝᠶᡝ ᡩᡝ ᡨᡠᠰᠠᠩᡤᠠ ᠰᡝᡥᡝ ᠪᠠᡩᡝ ᠠᡳᡴᠠᠪᠠᡩᡝ ᡤᡡᠨᡳᠨ ᡩᡝ ᡨᡝᠪᡠᡵᠠᡴᡡᠴᡳ ᠣᠮᠪᡳᠣ᠈ ᡴᡳᠴᡝᡵᠠᡴᡡᠴᡳ ᡤᡝᠯᡳ ᠣᠮᠪᡳᠣ᠉
凡如讀滿洲書的人 必定字=都該當明白知道 些須怠慢使不得 倘或這個書上若記的不明白 別的書上磞見了 可就不能的確知道 豈但這樣說 凡人有粟粒之技 尚且說于己有益 倘若不存心也使得庅 若不用心也使得庅
ᠠᡤᡝ ᡳ ᠠᠮᠪᠠ ᠠᠯᡤᡳᠨ ᠪᡝ ᡩᠣᠨᠵᡳᡶᡳ ᡤᠣᡳᡩᠠᡥᠠ᠈ ᡩᠠᠮᡠ ᠸᡝᠰᡳᡥᡠᠨ ᠴᡳᡵᠠ ᠪᡝ ᠪᠠᡥᠠᡶᡳ ᠠᠴᠠᡥᠠᡴᡡ᠈ ᡝᠨᡝᠩᡤᡳ ᠵᠠᠪᡧᠠᠨ ᡩᡝ᠈ ᡝᠮᡤᡝᡵᡳ ᡨᠠᡴᠠᡥᠠ ᠪᡝ ᡩᠠᡥᠠᠮᡝ᠈ ᠠᡤᡝ ᠰᡳ ᠸᠠᠯᡳᠶᠠᠮᡝ ᡤᡡᠨᡳᡵᠠᡴᡡ ᠣᠴᡳ᠈ ᠮᡳᠨᡳ ᠪᠣᠣᡩᡝ ᠮᠠᠵᡳᡤᡝ ᡶᡝᠯᡳᠶᡝᡵᡝᠣ᠈ ᠰᡳᠨᡳ ᡤᡳᠰᡠᡵᡝᡵᡝᠩᡤᡝ ᡠᠮᡝᠰᡳ ᡳᠨᡠ᠈ ᡝᠰᡳ ᠶᠠᠪᡠᠴᡳ᠈ ᠪᡳ ᡥᠣᠨᠣ ᠠᡤᡝ ᡳ ᠵᠠᡴᠠᡩᡝ ᡤᡝᠨᡝᡶᡳ ᡨᠠᠴᡳᠪᡠᡵᡝ ᠪᡝ ᡩᠣᠨᠵᡳᡴᡝ ᠰᡝᠮᡝ ᡤᡡᠨᡳᡵᡝ ᠪᠠᡩᡝ᠈ ᠰᡳᠨᡳ ᠪᠣᠣᡩᡝ ᡶᡝᠯᡳᠶᡝᡵᠠᡴᡡ ᠮᡠᠵᠠᠩᡤᠠᠣ᠈ ᡩᠠᠮᡠ ᠶᠠᠪᡠᡥᠠᡳ ᠠᡤᡝ ᡩᡝ ᡝᡳᠮᡝᠪᡠᡵᡝ ᡳᠨᡝᠩᡤᡳ ᠪᡳᡴᠠᡳ᠈ ᠠᡳ ᡤᡝᠯᡳ᠈ ᠪᡳ ᡩᠠᠮᡠ ᠠᡤᡝ ᠰᡳ ᠵᡳᡩᡝᡵᠠᡴᡡ ᠠᠶᠣᠣ ᠰᡝᡵᡝ ᡩᠠᠪᠠᠯᠠ᠈ ᠵᡳᠴᡳ ᡨᡝᡨᡝᠨᡩᡝᡵᡝ᠈ ᠪᡳ ᡠᡵᡤᡠᠨᠵᡝᡥᡝ ᠰᡝᠮᡝ ᠸᠠᠵᡳᡵᠠᡴᡡ ᠪᠠᡩᡝ᠈ ᡝᡳᠮᡝᡵᡝ ᡴᠣᠣᠯᡳ ᠪᡳᠣ᠈
久矣所見了兄長的大名譽 就只没得會見尊顏 今日萬幸 既然一遭認識了 兄長你若不棄想念 求祈往我家行走一行走 你說的狠是 自然要行走 我還想着要往兄長的根前領教去 果然不往你家行走的庅 只是走長了教阿哥厭煩的日子有啊 豈有此理 我只恐怕兄長你不肯來罷咧 既是肯來 我還喜之不盡 厭煩的規矩有庅
ᠠᡤᡝ ᠰᡳ ᠠᡨᠠᠩᡤᡳ ᡤᡝᠨᡝᠮᠪᡳ᠈ ᡤᡝᠨᡝᡴᡳ ᠰᡝᠴᡳ ᡠᡨᡥᠠᡳ ᡤᡝᠨᡝᠮᠪᡳ ᠰᡝᠮᡝ ᡥᡝᠨᡩᡠ᠈ ᡤᡝᠨᡝᡵᠠᡴᡡ ᠣᠴᡳ ᡠᡨᡥᠠᡳ ᡤᡝᠨᡝᡵᠠᡴᡡ ᠰᡝᠮᡝ ᡥᡝᠨᡩᡠ᠈ ᠪᡳ ᡩᠠᠮᡠ ᠰᡳᠨᡳ ᠠᠩᡤᠠᡳ ᠴᠠᠩᡤᡳ ᡤᡝᠨᡝᠮᠪᡳ ᠰᡝᡥᡝᠪᡝ ᡩᠣᠨᠵᡳᡵᡝ ᡩᠠᠪᠠᠯᠠ᠈ ᠰᡳ ᡝᠮᡤᡝᡵᡳ ᠶᠠᡵᡤᡳᠶᠠᠨ ᡳ ᡤᡝᠨᡝᡵᡝ ᠪᡝ ᠣᡵᠣᠨ ᠰᠠᠪᡠᡥᠠᡴᡡ᠈ ᡩᠣᡳᡤᠣᠨᡩᡝ ᡨᠣᡴᡨᠣᠪᡠᠮᡝ ᡤᡳᠰᡠᡵᡝᡶᡳ ᡤᡡᠸᠠ ᠨᡳᠶᠠᠯᠮᠠ ᡳᠨᡠ ᡠᡨᡥᠠᡳ ᡴᡝᠨᡝᡥᡠᠨᠵᡝᡵᠠᡴᡡ ᠣᠮᠪᡳ ᠰᡝᠴᡳᠨᠠ᠈ ᡝᡵᡝ ᡤᡝᠰᡝ ᡴᠣᠣᠯᡳ ᠠᡴᡡ ᠪᠠᡳᡨᠠ ᡤᡝᠯᡳ ᠪᡳᠨᡳ᠈ ᠪᡳ ᡤᡝᠨᡝᡴᡳ ᠰᡝᠴᡳ ᡳᠨᡠ ᠮᡳᠨᡳ ᠴᡳᡥᠠ᠈ ᡤᡝᠨᡝᡵᠠᡴᡡ ᠣᠴᡳ ᡳᠨᡠ ᠮᡳᠨᡳ ᠴᡳᡥᠠ ᡩᠠᠪᠠᠯᠠ᠈ ᡠᡵᡠᠨᠠᡴᡡ ᠰᡳᠨᡩᡝ ᠠᠯᠠᡶᡳ ᠠᡳᠨᠠᠮᠪᡳ᠈ ᡨᡝᡵᡝ ᠠᠩᡤᠠᠯᠠ᠈ ᠪᡳ ᠴᠠᠨᠠᠩᡤᡳ ᡨᡠᠪᠠᡩᡝ ᡳᠰᡳᠨᠠᡶᡳ ᡝᡵᡝ ᡝᠮᡠ ᠪᠠᡳᡨᠠ ᠵᠠᡳ ᠪᠠᡳᡵᡝ ᡨᡠᡵᡤᡠᠨ ᠪᡝ ᠰᡠᠸᠠᠯᡳᠶᠠᠮᡝ ᡤᡝᠮᡠ ᡨᡝᡩᡝ ᡧᠠᠩᡤᠠᠪᡠᠮᡝ ᡤᡳᠰᡠᡵᡝᡶᡳ ᠵᡳᡥᡝᠩᡤᡝ ᡴᠠᡳ᠈ ᠰᡳ ᠠᡳᠪᡳᡩᡝ ᠪᡳᡥᡝ᠈ ᡝᡵᡝ ᡝᡵᡳᠨ ᡩᡝ ᡨᡝᠨᡳ ᠵᡳᡶᡳ᠈ ᡤᡝᠵᡳᠩ ᠰᡝᠮᡝ ᠰᡳᠨᡩᡝ ᠸᠠᠴᡳᡥᡳᠶᠠᠮᡝ ᠠᠯᠠ ᠰᡝᠴᡳ ᡤᡝᠯᡳ ᠣᠮᠪᡳᠣ᠉
阿哥你幾時去 說要去就說去 若不去就說不去 我只听見寡你的嘴說去罷咧 縂没見你一遭児真去 預先說定了 別人可也就不疑惑了 這樣無理的事也有呢 我若是要去 也由着我 若是不去 也由着我罷咧 必定告訴你作什庅 况且我前日到了那裡 把這一件事 併連懇求的緣故都合他說完畢了來的啊 你在那裡來着 這時候纔來 絮=叨=的盡情都?得庅
ᡝᡵᡝ ᠪᠠᡳᡨᠠ ᠰᡳᠨᠴᡳ ᡨᡠᠯᡤᡳᠶᡝᠨ᠈ ᡤᡡᠸᠠ ᠨᡳᠶᠠᠯᠮᠠ ᠠᡳᠨᠠᡥᠠ ᠰᡝᠮᡝ ᡳᠨᡠ ᠰᠠᡵᡴᡡ᠈ ᠰᡳ ᡠᠨᡝᠩᡤᡳ ᠰᠠᡵᠠᠩᡤᡝ ᡤᡝᡨᡠᡴᡝᠨ ᠣᠴᡳ᠈ ᡠᡨᡥᠠᡳ ᠮᡳᠨᡩᡝ ᡠᠯᡥᡳᠪᡠᠮᡝ ᠠᠯᠠᡵᡝᠣ᠈ ᠪᡳ ᠶᠠᡵᡤᡳᠶᠠᠨ ᡳ ᠰᠠᡵᡴᡡ ᡴᠠᡳ᠈ ᠰᠠᠴᡳ ᡠᡨᡥᠠᡳ ᠰᡳᠨᡩᡝ ᠠᠯᠠᠮᠪᡳ ᡩᡝᡵᡝ᠈ ᡠᠮᠠᡳ ᠰᠠᡵᡴᡡ ᠪᠠᡩᡝ᠈ ᠮᡳᠮᠪᡝ ᠠᡳᠪᡝ ᠠᠯᠠ ᠰᡝᠮᠪᡳ᠈ ᠠᡴᡡᠴᡳ ᠮᡳᠮᠪᡝ ᠪᠠᠯᠠᡳ ᠪᠠᠨᠵᡳᠪᡠᡶᡳ ᠠᠯᠠ ᠰᡝᠮᠪᡳᠣ᠈ ᡝᡳᠴᡳᠪᡝ ᠰᡠᠸᡝ ᡳᠨᡠ ᠪᠠᡥᠠᡶᡳ ᡩᠣᠨᠵᡳᡵᡝᠩᡤᡝ ᡴᠠᡳ᠈ ᠠᡳᠰᡝᠮᡝ ᡝᡴᡧᡝᠮᠪᡳ᠈ ᠵᠣᠣᠴᡳᠨᠠ᠈ ᠪᡳ ᡨᡠᠸᠠᠴᡳ ᡤᡡᠸᠠ ᠨᡳᠶᠠᠯᠮᠠ ᠰᡳᠨᡩᡝ ᡝᠮᡠ ᠪᠠᡳᡨᠠ ᡶᠣᠨᠵᡳᠴᡳ᠈ ᠰᡳ ᡠᡨᡥᠠᡳ ᡩᠠᠴᡳ ᡩᡠᠪᡝ ᡩᡝ ᡳᠰᡳᡨᠠᠯᠠ᠈ ᡤᡳᠶᠠᠨ ᡤᡳᠶᠠᠨ ᡳ ᠠᠯᠠᠮᠪᡳ᠈ ᠪᡳ ᠠᡳᡴᠠ ᠰᡳᠨᡩᡝ ᡝᠮᡠ ᠪᠠᡳᡨᠠ ᡶᠣᠨᠵᡳᠮᡝ ᠣᡥᠣᡩᡝ᠈ ᠰᡳ ᡠᡨᡥᠠᡳ ᠰᠠᡵᡴᡡ ᠰᡝᡵᡝ᠈ ᡩᠣᠨᠵᡳᡥᠠᡴᡡ ᠰᡝᡵᡝ᠈ ᠪᠠᡳᠪᡳ ᡝᡵᡴᡝᠨ ᡨᡝᡵᡴᡝᠨ ᠰᡝᠮᡝ ᠮᡳᠨᡳ ᠪᠠᡵᡠ ᠰᡳᠯᡨᠠᠮᠪᡳ᠈ ᠰᡳᠮᠪᡝ ᡤᡝᠯᡳ ᠨᡳᠶᠠᠯᠮᠠ ᠰᡝᠴᡳ ᠣᠮᠪᡳᠣ᠉
這个事情除了你之外 別人斷然也不知道 你若是果然知道的明白 求祈就告訴我知曉 我實=的不知道啊 若是知道就告訴你罷咱的 並不知道 教我告訴什庅 莫不是教我胡編派了告訴庅 縂是你們也得听的見的啊 何必忙 罷是呢 我看別人若問你一件事情 你就從頭至尾 一件=的告訴 我若問你一件事情的時候 你就說不知道 說没听見 平白的支吾望着我推託 你也筭說是箇人庅
ᠠᡤᡝ ᠰᡳ ᠠᡨᠠᠩᡤᡳ ᠸᡝᠰᡳᡴᡝᠩᡤᡝ᠈ ᠠᠮᠪᠠ ᡠᡵᡤᡠᠨ ᡴᠠᡳ᠈ ᠪᡳ ᠣᡵᠣᠨ ᡳᠨᡠ ᠪᠠᡥᠠᡶᡳ ᡩᠣᠨᠵᡳᡥᠠᡴᡡ᠈ ᡩᠣᠨᠵᡳᠮᠪᡳᡥᡝ ᠪᡳᠴᡳ᠈ ᡠᡵᡤᡠᠨ ᡳ ᡩᠣᡵᠣᡳ ᠠᠴᠠᠨᠠᠮᡝ ᡤᡝᠨᡝᠴᡳ ᠠᠴᠠᠮᠪᡳᡥᡝ᠈ ᠰᠠᡵᡴᡡ ᠣᠵᠣᡵᠣ ᠵᠠᡴᠠᡩᡝ᠈ ᡨᡠᡨᡨᡠ ᡠᡵᡤᡠᠨ ᠠᡵᠠᠮᡝ ᡤᡝᠨᡝᡥᡝᡴᡡ᠈ ᠠᡤᡝ ᡠᠮᡝ ᡝᡥᡝ ᡤᡡᠨᡳᡵᡝ᠈ ᠪᡳᡵᡝᠮᡝ ᠶᠣᠣᠨᡳ ᠸᠠᠯᡳᠶᠠᠮᡝ ᡤᠠᠮᠠᡵᡝᠣ᠈ ᠠᡤᡝ ᠠᡳᠨᡠ ᡠᡨᡨᡠ ᡤᡳᠰᡠᡵᡝᠮᠪᡳ᠈ ᠮᡠᠰᡝ ᡤᡝᠮᡠ ᠰᠠᡳᠨ ᡤᡠᠴᡠ ᡴᠠᡳ᠈ ᡩᡝᡵᡝ ᠠᠴᠠᠴᡳ ᡠᡨᡥᠠᡳ ᠸᠠᠵᡳᡥᠠ᠈ ᡠᡵᡠᠨᠠᡴᡡ ᡠᠨᡨᡠᡥᡠᠨ ᡩᠣᡵᠣ ᠪᡝ ᠸᡝᠰᡳᡥᡠᠯᡝᡶᡳ ᠠᡳᠨᠠᠮᠪᡳ᠈ ᡤᡠᠴᡠᠰᡝᡳ ᡩᠣᠯᠣ ᡤᡠᠴᡠᠯᡝᡵᡝᡩᡝ᠈ ᡩᠠᠮᡠ ᡳᠰᡥᡠᠨᡩᡝ ᠮᡠᠵᡳᠯᡝᠨ ᡩᡝ ᡨᡝᠪᡠᠮᡝ ᠪᡳᠴᡳ᠈ ᡨᡝᠨᡳ ᡤᡠᠴᡠ ᡳ ᡩᠣᡵᠣ ᡩᠠᠪᠠᠯᠠ᠈ ᡨᡝᡵᡝ ᡩᡠᡵᡠᠨ ᡳ ᡶᡳᠶᠠᠨᠠᡵᠠᡵᠠᠩᡤᡝ ᡤᡝᠮᡠ ᡥᠣᠯᠣ ᡴᠠᡳ᠈ ᡝᠮᡝᠮᡠ ᡠᡵᠰᡝ ᡠᠨᡨᡠᡥᡠᠨ ᡩᠣᡵᠣ ᡩᡝ᠈ ᡠᡩᡠ ᡩᡝᠮᠪᡝᡳ ᡥᠠᠪᠴᡳᡥᡳᠶᠠᠨ ᠪᡳᠴᡳᠪᡝ᠈ ᠠᡳᡴᠠᠪᠠᡩᡝ ᡳᠨᡳ ᠪᠠᡵᡠ ᡝᠮᡠ ᡤᡡᠨᡳᠨ ᠮᡠᠵᡳᠯᡝᠨ ᡳ ᠪᠠᡳᡨᠠ ᠪᡝ ᡥᡝᠪᡩᡝᠨᡝᠴᡳ᠈ ᡩᠠᠮᡠ ᠣᡳᠯᠣᡵᡳ ᡩᡝᠯᡝᡵᡳ ᠰᡝᠮᡝ ᠵᠠᠪᡠᠮᠪᡳ᠈ ᡨᡝᡵᡝ ᡤᡝᠰᡝᠩᡤᡝ ᠣᠴᡳ ᠠᡳ ᠠᠮᡨᠠᠩᡤᠠ᠉
阿哥你是幾時高陞了的 大喜呀 我縂連影児也没得聽見 若是听見 該當望喜去來着 因爲不知道 故此没有去賀喜 阿哥別不好思量 諸凡求祈容諒 阿哥怎庅這樣說 咱們都是好朋友啊 見面就完了 必定尚虛套禮作什庅 朋友們相交之間 只要彼此心裡盛着 纔是朋友的道理罷咧 那樣奏作的都是假呀 或有一等人們在虛套禮上 雖然甚寔响快 倘若望着他商量一件心復的事児 只是浮面皮児答應 若像那樣的 有什庅趣児
ᠰᡳᡴᠰᡝ ᠰᡳ ᠠᡳᠪᡳᡩᡝ ᡤᡝᠨᡝᡥᡝ ᠪᡳᡥᡝ᠈ ᠪᡳ ᠨᡳᠶᠠᠯᠮᠠ ᠪᡝ ᠠᡴᡡᡵᠠᡶᡳ᠈ ᠰᡳᠮᠪᡝ ᠰᠣᠯᡳᠮᡝ ᡤᠠᠨᠠᠪᡠᠴᡳ᠈ ᠰᡳᠨᡳ ᠪᠣᠣᡳ ᠨᡳᠶᠠᠯᠮᠠ ᠰᡳᠮᠪᡝ ᠪᠣᠣᡩᡝ ᠠᡴᡡ᠈ ᡤᡡᠸᠠᠪᠰᡳ ᡤᡝᠨᡝᡥᡝ ᠰᡝᡥᡝ᠈ ᠪᡳ ᠰᡳᠮᠪᡝ ᠪᠣᡩᠣᠴᡳ᠈ ᠠᡳᠨᠴᡳ ᠮᡝᠨᡳ ᠪᠣᠣᡩᡝ ᠵᡳᠮᠪᡳ ᡩᡝᡵᡝ ᠰᡝᠮᡝ᠈ ᡝᠮᡠ ᡳᠨᡝᠩᡤᡳ ᡧᡠᠨ ᡨᡠᡥᡝᡨᡝᠯᡝ ᠠᠯᡳᠶᠠᠴᡳ᠈ ᠰᡳ ᡠᠮᠠᡳ ᠵᡳᡥᡝᡴᡡ᠈ ᠪᠠᡳᠪᡳ ᡝᠮᡠ ᡳᠨᡝᠩᡤᡳ ᠠᠯᡳᠶᠠᡥᠠ᠈ ᡤᡡᠸᠠ ᡝᠮᡠ ᠪᠠᡳᡨᠠ ᡩᡝ ᡤᡝᠨᡝᡴᡳ ᠰᡝᠴᡳ᠈ ᡤᡝᠯᡳ ᠰᡳᠮᠪᡝ ᠵᡳᡩᡝᡵᠠᡥᡡ ᠰᡝᠮᠪᡳ᠈ ᠠᠪᠰᡳ ᡤᡡᠨᡳᠨ ᠪᠠᡳᠪᡠᡥᠠ ᠨᡳ᠈ ᠠᡤᡝ ᠰᡳᠨᡳ ᡝᡵᡝ ᡠᡨᡥᠠᡳ ᠸᠠᡴᠠ ᠣᡥᠣᠪᡳ᠈ ᠸᡝ ᠶᠠ ᡩᡝ ᡝᠮᡠ ᡥᡝᡧᡠ ᡥᠠᡧᡠ ᡳ ᠪᠠᡳᡨᠠ ᠠᡴᡡ ᠨᡳ᠈ ᡩᠠᠮᡠ ᠸᡝᡵᡳ ᠪᠣᠣᡩᡝ ᡶᡝᠯᡳᠶᡝᠮᠪᡳᠣ᠈ ᡨᡝᡵᡝ ᠠᠩᡤᠠᠯᠠ᠈ ᠮᡳᠨᡳ ᠪᡝᠶᡝ ᡧᡠᠨᡨᡠᡥᡠᠨᡳ ᠠᠯᠪᠠᠨ ᡩᡝ ᡴᠠᠮᡝ ᠵᠠᠪᡩᡝᡵᠠᡴᡡ ᠪᡳᠮᡝ᠈ ᠸᡝᡵᡳ ᠴᡳᠰᡠᡳ ᠪᠠᡳᡨᠠᡩᡝ ᡩᠠᠨᠠᠮᡝ ᡤᡝᠨᡝ ᠸᡝᠴᡳ᠈ ᡤᡳᠶᠠᠨᠠᡴᡡ ᡧᠣᠯᠣ ᠪᡳᠣ᠉
昨日你望那裡去來着 我使了去請你 你的家人說你没在家往别處去了 我筭計着你 想必是往我們家来了罷 等了一天直到日頭落 你竟没有来 白等了一日 别的一宗事情上要去 又恐怕你来 很糟了心了呢 阿哥你這就不是了 誰没一个冗雜的事児呢 只是往别人家行走庅 況且我身子整日甲應答差事不得閒児 再教去管別人家的私事 也能有功夫庅
ᠪᡳ ᠰᡳᠨᡩᡝ ᠶᠠᠨᡩᡠᡥᠠ ᠪᠠᡳᡨᠠ ᠪᡝ ᠰᡳ ᡨᡝᡩᡝ ᡥᡝᠨᡩᡝᡥᡝᠪᡳᠣ᠈ ᡨᡝᡵᡝ ᡤᡡᠨᡳᠨ ᠪᡝ ᡨᡠᠸᠠᠴᡳ ᠣᠮᠪᡳᠣ ᠣᠵᠣᡵᠠᡴᡡᠨ᠈ ᠪᡳ ᡨᡝᡩᡝ ᡥᡝᠨᡩᡠᡥᡝᠪᡳ᠈ ᡳᠨᡳ ᡥᡝᠨᡩᡠᡵᡝᠩᡤᡝ᠈ ᡝᠮᡠ ᠨᡳᠶᠠᠯᠮᠠᡳ ᠪᠠᡳᡨᠠ ᠣᠴᡳ᠈ ᡴᡝᠮᡠᠨᡳ ᠵᠠ ᠪᡳᡥᡝ᠈ ᡤᡝᡵᡝᠨ ᡳ ᠪᠠᡳᡨᠠ ᠣᠵᠣᡵᠣ ᠵᠠᡴᠠᡩᡝ ᡠᠮᡝᠰᡳ ᠮᠠᠩᡤᠠ᠈ ᡝᠯᡥᡝᡴᡝᠨ ᡳ ᠣᠰᠣ ᡠᠮᡝ ᡥᠠᡥᡳᠯᠠᡵᠠ ᠰᡝᡥᡝ᠈ ᠪᡳ ᡤᡝᠯᡳ ᡝᡵᡝ ᠪᠠᡳᡨᠠ ᠪᡝ ᠵᡳᡩᡠᠵᡳ ᠠᡨᠠᠩᡤᡳ ᡨᡝᠨᡳ ᠶᠠᡵᡤᡳᠶᠠᠨ ᠮᡝᠵᡳᡤᡝ ᠪᠠᡥᠠᡵᠠ ᠰᡝᠮᡝ ᡳᠨᡩᡝ ᡶᠣᠨᠵᡳᠴᡳ᠈ ᡳᠨᡳ ᡤᡳᠰᡠᠨ ᠮᡝᠵᡳᡤᡝ ᠪᠠᡥᠠᠴᡳ᠈ ᠰᡳᠨᡩᡝ ᠪᡝᠨᡝᠪᡠᠴᡳ ᡠᡨᡥᠠᡳ ᠸᠠᠵᡳᡥᠠ᠈ ᠠᡳᠰᡝᠮᡝ ᡝᠮᡩᡠᠪᡝᡳ ᡶᠣᠨᠵᡳᠮᠪᡳ ᠰᡝᡥᡝ᠈ ᠪᡳ ᡳᠨᡳ ᠠᡵᠪᡠᠨ ᠪᡝ ᡨᡠᠸᠠᠴᡳ ᡳᠨᡠ ᠪᠠᡳᡨᠠ ᠪᡝ ᠰᠠᡵᡨᠠᠪᡠᡵᡝ ᠨᡳᠶᠠᠯᠮᠠ ᠸᠠᡴᠠ᠈ ᠰᡳ ᡩᠠᠮᡠ ᠮᡠᠵᡳᠯᡝᠨ ᠪᡝ ᠰᡠᠯᠠᡴᠠᠨ ᠰᡳᠨᡩᠠ᠈ ᠰᡳᠨᡳ ᠪᠠᡳᡨᠠ ᠪᡝ ᠮᡠᡨᡝᠪᡠᠴᡳ ᡠᡨᡥᠠᡳ ᠸᠠᠵᡳᡥᠠ᠈ ᡝᡩᡝ ᠠᡳ ᡴᡝᠨᡝᡥᡠᠨᠵᡝᡵᡝ ᠪᠠᠪᡳ᠉
我煩你的事 你合他說了庅 看他的意思使得使不得 我已是合他說了 他說的話 若是一个人的事 還容易来着 因為是衆人的事甚難 說教慢=的别急了 我又問他這个事情到底幾時纔得實信 他的話 說是一得信 給你送去就完了 不必儘着問 我看他的光景児 也不是悮事的人 你只管把心放寬着 把你的事情成就了就完了 這有什庅多疑的去處
ᠰᡳ ᠨᠠᡵᠠᠩᡤᡳ ᠮᡳᠮᠪᡝ ᠠᡳᠪᡳᡩᡝ ᡤᡝᠨᡝ ᠰᡝᠮᠪᡳ᠈ ᡤᠠᡳᡨᠠᡳ ᡠᡨᡨᡠ ᠣᡴᡳ ᠰᡝᠮᠪᡳᠮᡝ᠈ ᡥᠣᠯᡴᠣᠨᡩᡝ ᡤᡝᠯᡳ ᡨᡠᡨᡨᡠ ᠣᡴᡳ ᠰᡝᠮᠪᡳ᠈ ᠠᠪᠰᡳ ᡨᠣᡴᡨᠣᡥᠣᠨ ᠠᡴᡡ ᠪᠠᡳ᠈ ᡝᠮᡠ ᠠᡴᡩᡠᠨ ᡤᡳᠰᡠᠨ ᠪᡳᠴᡳ ᡤᡡᠸᠠ ᠨᡳᠶᠠᠯᠮᠠ ᡳᠨᡠ ᡩᠠᡥᠠᠮᡝ ᠶᠠᠪᡠᡵᡝ ᡩᡝ ᠵᠠ ᠰᡝᠴᡳᠨᠠ᠈ ᡝᡵᡝ ᡤᡝᠰᡝ ᠠᠩᡤᠠ ᡠᠪᠠᡧᠠᡴᡡ ᠨᡳᠶᠠᠯᠮᠠ ᡤᡝᠯᡳ ᠪᡳᠨᡳ᠈ ᠰᡳᠨᡳ ᠪᡝᠶᡝ ᡤᡝᠨᡝᡴᡳ ᠰᡝᡥᡝ ᡩᠠᠪᠠᠯᠠ᠈ ᠸᡝ ᠰᡳᠮᠪᡝ ᡤᡝᠨᡝ ᠰᡝᡥᡝ᠈ ᡨᡝ ᠪᡳᠴᡳᠪᡝ ᡤᡝᠨᡝᡵᠠᡴᡡ ᠨᡳᠶᠠᠯᠮᠠ ᠪᡝ ᡝᡵᡤᡝᠯᡝᡨᡝᡳ ᡤᡝᠨᡝ ᠰᡝᠴᡳ ᠣᠮᠪᡳᠣ᠈ ᠨᡳᠶᠠᠯᠮᠠᡳ ᡥᡝᠨᡩᡠᡵᡝ ᠪᠠᠯᠠᠮᠠ᠈ ᠨᡳᠶᠠᠯᠮᠠ ᠪᡝ ᠰᠠᡥᠠᠩᡤᡝ ᡤᡝᡨᡠᡴᡝᠨ᠈ ᠪᡝᠶᡝᠪᡝ ᠰᠠᡥᠠᠩᡤᡝ ᡥᡡᠯᡥᡳ ᠰᡝᡥᡝᠩᡤᡝ ᡴᠠᡳ᠈ ᠶᠠᠶᠠ ᠪᠠᡳᡨᠠ ᡩᡝ ᡩᠠᠮᡠ ᠪᡝᠶᡝᡳ ᠴᡳᡥᠠᡴᡡ ᠪᠠᠪᡝ᠈ ᡳᠨᡠ ᠨᡳᠶᠠᠯᠮᠠ ᡩᡝ ᡠᠮᡝ ᡳᠰᡳᠪᡠᡵᡝ ᠣᠴᡳ᠈ ᠠᡳᠨᠴᡳ ᠣᠵᠣᡵᠠᡴᡡ ᠰᡝᡵᡝ ᠪᡝ ᡠᡨᡥᠠᡳ ᠠᡴᡡ ᡩᡝᡵᡝ᠈ ᠮᡳᠨᡳ ᡝᠮᡠ ᠪᠠᡳᡨᠠ᠈ ᠪᠠᡳᠪᡳ ᠶᠠᠪᡠᠴᡳ ᠣᠵᠣᡵᠠᡴᡡ ᡤᡝᠰᡝ᠈ ᠠᡤᡝ ᠰᡳ ᡤᠣᠰᡳᠴᡳ ᠮᡳᠨᡳ ᡶᡠᠨᡩᡝ ᡤᡝᠨᡝᡶᡳ ᡤᡳᠰᡠᡵᡝᠮᡝ ᠮᡠᡨᡝᠪᡠᡥᡝ ᠮᠠᠩᡤᡳ᠈ ᠪᡳ ᠠᡤᡝ ᡳ ᡶᡝᡵᡤᡠᠸᡝᠴᡠᡴᡝ ᡥᡡᠨᡳᠨ ᠪᡝ ᠠᡳᠨᠠᡥᠠ ᠰᡝᠮᡝ ᡠᡵᡤᡝᡩᡝᡵᠠᡴᡡ᠈ ᡠᡵᡠᠨᠠᡴᡡ ᡠᠵᡝᠨ ᠪᠠᡳᠯᡳ ᡳᠰᡳᠪᡠᡴᡳ᠈ ᡝᡵᡝ ᡤᡝᠮᡠ ᠠᠨ ᡳ ᠵᡝᡵᡤᡳ ᠪᠠᡳᡨᠠ ᡴᠠᡳ᠈ ᠰᡳᠨᡳ ᠪᡝᠶᡝ ᡤᡝᠨᡝᡶᡳ ᡠᡨᡥᠠᡳ ᡤᡳᠰᡠᡵᡝᠮᠪᡳ ᡩᡝᡵᡝ᠈ ᡝᡩᡝ ᠨᡳᠶᠠᠯᠮᠠ ᡩᡝ ᠠᡳ ᠪᠠᡳᡵᡝ ᠪᠠᠪᡳ᠈ ᡨᡠᡨᡨᡠ ᠰᡝᠮᡝ ᡨᡝ ᡩᠣᡳᡤᠣᠨᡩᡝ ᡤᡳᠰᡠᡵᡝᡵᠠᡴᡡᠴᡳ ᠣᠵᠣᡵᠠᡴᡡ᠈ ᠠᡳᡴᠠᠪᠠᡩᡝ ᡨᡝ ᠮᡠᡨᡝᠮᠪᡳ ᠰᡝᠮᡝ ᡥᡝᠨᡩᡠᡶᡳ᠈ ᠠᠮᠠᡤᠠ ᡳᠨᡝᠩᡤᡳ ᠮᡠᡨᡝᡵᠠᡴᡡ ᠣᡥᠣᡩᡝ ᠠᡳᠨᠠᡵᠠ᠈ ᡨᡝ ᠮᡠᡨᡝᠪᡠᡵᠠᡴᡡ ᠰᡝᠮᡝ ᡥᡝᠨᡩᡠᠴᡳ ᠠᠮᠠᡤᠠ ᡳᠨᡝᠩᡤᡳ ᠮᡠᡨᡝᠪᡠᡥᡝᡩᡝ ᡤᡝᠯᡳ ᠠᡳᠨᠠᡵᠠ᠈ ᡤᡳᠶᠠᠨ ᠪᡝ ᠪᠣᡩᠣᠮᡝ ᠣᡥᠣᡩᡝ᠈ ᠪᡳ ᡝᠰᡳ ᠮᡠᡨᡝᡵᡝᡳ ᡨᡝᡳᠯᡝ ᡶᠠᡧᡧᠠᠴᡳ᠈ ᡨᠠᠯᡠ ᡩᡝ ᠰᡳᠨᡳ ᠪᠠᡳᡨᠠ ᠪᡝ ᠮᡠᡨᡝᠪᡠᠴᡳ᠈ ᠰᡳ ᡳᠨᡠ ᡠᠮᡝ ᡠᡵᡤᡠᠨᠵᡝᡵᡝ᠈ ᠰᡳᠨᡳ ᠪᠠᡳᡨᠠ ᠪᡝ ᠮᡠᡨᡝᠪᡠᡵᠠᡴᡡ ᠣᠴᡳ ᠰᡳ ᡳᠨᡠ ᡠᠮᡝ ᡠᠰᡥᠠᡵᠠ᠈ ᡠᡨᡨᡠ ᠣᡥᠣᡩᡝ᠈ ᠪᡳ ᡨᡝᠨᡳ ᠰᡳᠨᡳ ᡶᡠᠨᡩᡝ ᡤᡝᠨᡝᡶᡳ᠈ ᡶᠠᡧᡧᠠᠴᡳ ᠣᠮᠪᡳ᠉