满文道德经(道部)
ᡤᡝᠪᡠ ᠪᡝ ᡤᡝᠪᡠ ᠣᠴᡳ ᠣᠵᠣᡵᠣᠩᡤᡝ᠈ ᡝᠨᡨᡝᡥᡝᠮᡝ ᡤᡝᠪᡠ ᠸᠠᡴᠠ᠉ ᡤᡝᠪᡠ ᠠᡴᡡᠩᡤᡝ ᠠᠪᡴᠠ ᠨᠠ ᡳ ᡩᡝᡵᡳᠪᡠᠨ᠉ ᡤᡝᠪᡠ ᠪᡳᠰᡳᡵᡝᠩᡤᡝ ᡨᡠᠮᡝᠨ ᠵᠠᡴᠠ ᡳ ᡶᡠᠰᡝᠨ᠉ ᡨᡠᡨᡨᡠ ᠣᡶᡳ ᡴᡝᠮᡠᠨᡳ ᡤᡡᠨᡳᠨ ᠠᡴᡡ ᡳ ᡨᡝᡵᡝᡳ ᡶᡝᡵᡤᡠᠸᡝᠴᡠᡴᡝ ᠪᡝ ᠴᡳᠨᠴᡳᠯᠠᠮᡝ᠈ ᡴᡝᠮᡠᠨᡳ ᡤᡡᠨᡳᠨ ᠪᡳᡶᡳ ᡨᡝᡵᡝᡳ ᡨᡠᡥᡝ ᠪᡝ ᠴᡳᠨᠴᡳᠯᠠᠮᡝ᠈ ᡝᡵᡝ ᠵᡠᠸᡝ ᡥᠠᠴᡳᠨ ᠰᡝᡵᡝᠩᡤᡝ᠈ ᡨᡠᠴᡳᠨ ᠠᡩᠠᠯᡳ ᠰᡝᠮᡝ᠈ ᡤᡝᠪᡠ ᡝᠨᠴᡠ᠉ ᡝᡵᡝᠪᡝ ᡤᡝᠮᡠ ᡶᡝᡵᡤᡠᠸᡝᠴᡠᠨ ᠰᡝᠮᠪᡳ᠉ ᡶᡝᡵᡤᡠᠸᡝᠴᡠᠨ ᡩᠠᡩᡝ ᡶᡝᡵᡤᡠᠸᡝᠴᡠᠨ ᠣᡥᠣᡩᡝ᠈ ᡤᡝᡵᡝᠨ ᡶᡝᡵᡤᡠᠸᡝᠴᡠᡴᡝ ᡳ ᡩᡠᡴᠠ ᡴᠠᡳ᠉
ᠠᠪᡴᠠᡳ ᡶᡝᠵᡝᡵᡤᡳᠩᡤᡝ ᡤᡝᠮᡠ ᠰᠠᡳᡴᠠᠨ ᠪᡝ ᠰᠠᡶᡳ ᠶᠠᠪᡠᡵᡝ ᠣᡥᠣᡩᡝ᠈ ᠰᠠᡳᡴᠠᠨ ᡠᡨᡥᠠᡳ ᡝᡥᡝ ᠣᡥᠣ᠉
ᡤᡝᠮᡠ ᠰᠠᡳᠨ ᠪᡝ ᠰᠠᡶᡳ ᠶᠠᠪᡠᡵᡝ ᠣᡥᠣᡩᡝ᠈ ᠰᠠᡳᠨ ᡠᡨᡥᠠᡳ ᠰᠠᡳᠨ ᠠᡴᡡ ᠣᡥᠣ᠉
ᡨᡠᡨᡨᡠ ᠣᡶᡳ ᠪᡳᠰᡳᡵᡝ ᠠᡴᡡ ᡳᠰᡥᡠᠨᡩᡝ ᠪᠠᠨᠵᡳᠨᠠᠮᠪᡳ᠉
ᠮᠠᠩᡤᠠ ᠵᠠ ᡳᠰᡥᡠᠨᡩᡝ ᠮᡠᡨᡝᠪᡠᠮᠪᡳ᠉ ᡤᠣᠯᠮᡳᠨ ᡶᠣᡥᠣᠯᠣᠨ ᡳᠰᡥᡠᠨᡩᡝ ᡨᡠᠶᡝᠮᠪᡠᠮᠪᡳ᠉
ᡨᡝᠨ ᡶᠠᠩᡴᠠᠯᠠ ᡳᠰᡥᡠᠨᡩᡝ ᡨᡠᡥᡝᠪᡠᠮᠪᡳ᠉ ᠵᡳᠯᡤᠠᠨ ᠮᡠᡩᠠᠨ ᡳᠰᡥᡠᠨᡩᡝ ᠠᠴᠠᠪᡠᠮᠪᡳ᠉
ᠵᡠᠯᡝᡵᡳ ᠠᠮᠠᠯᠠ ᡳᠰᡥᡠᠨᡩᡝ ᡩᠠᡥᠠᠮᠪᡳ᠉ ᡠᡨᡨᡠ ᠣᡶᡳ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᡠᡳᠯᡝᠨ ᠠᡴᡡ ᡳ ᠪᠠᡳᡨᠠ ᠪᡝ ᠶᠠᠪᡠᠮᡝ᠈
ᡤᡳᠰᡠᡵᡝᡵᠠᡴᡡ ᡳ ᡨᠠᠴᡳᡥᡳᠶᠠᠨ ᠪᡝ ᠰᡝᠯᡤᡳᠶᡝᠮᡝ᠈ ᡨᡠᠮᡝᠨ ᠵᠠᡴᠠ ᡩᡝᡵᡳᠪᡠᠮᠪᡳᠮᡝ ᠨᠠᡴᠠᡵᠠᡴᡡ᠈
ᠪᠠᠨᠵᡳᠮᠪᡳᠮᡝ ᠪᡳᠰᡳᡵᠠᡴᡡ᠈ ᠠᡵᠠᠮᠪᡳᠮᡝ ᠠᡴᡩᠠᡵᠠᡴᡡ᠈ ᡤᡠᠩᡤᡝ ᠮᡠᡨᡝᠪᡠᠮᠪᡳᠮᡝ ᡨᡝᠪᡠᡵᠠᡴᡡ᠉
ᡨᡝᡵᡝ ᡩᠠᠮᡠ ᡨᡝᠪᡠᡵᠠᡴᡡ ᠣᡶᡳ᠈ ᡨᡠᡨᡨᡠ ᡠᡶᠠᡵᠠᠪᡠᡵᠠᡴᡡ ᠪᡳᡥᡝᠪᡳ᠉
ᠮᡝᡵᡤᡝᠨ ᠪᡝ ᡠᠵᡝᠯᡝᡵᠠᡴᡡᠩᡤᡝ᠈ ᡳᡵᡤᡝᠨ ᠪᡝ ᡨᡝᠮᡧᡝᡵᠠᡴᡡ ᠣᠪᡠᡵᡝᠩᡤᡝ᠈
ᠪᠠᡥᠠᡵᠠ ᡩᡝ ᠮᠠᠩᡤᠠ ᠵᠠᡴᠠ ᠪᡝ ᠸᡝᠰᡳᡥᡠᠯᡝᡵᠠᡴᡡᠩᡤᡝ᠈ ᡳᡵᡤᡝᠨ ᠪᡝ ᡥᠣᠯᡥᠠᡵᠠᡴᡡ ᠣᠪᡠᡵᡝᠩᡤᡝ᠈
ᠪᡠᠶᡝᠴᡳ ᠣᠵᠣᡵᠣ ᠪᡝ ᠰᠠᠪᡠᡵᠠᡴᡡᠩᡤᡝ᠈ ᠮᡠᠵᡳᠯᡝᠨ ᠪᡝ ᡶᠠᡵᡶᠠᠪᡠᡵᠠᡴᡡ ᠣᠪᡠᡵᡝᠩᡤᡝ᠉
ᡠᡨᡨᡠ ᠣᡶᡳ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ᠈ ᡨᡝᡵᡝᡳ ᠮᡠᠵᡳᠯᡝᠨ ᠪᡝ ᡴᡠᠨᡩᡠᠯᡝᠮᡝ᠈
ᡨᡝᡵᡝᡳ ᡥᡝᡶᡝᠯᡳ ᠪᡝ ᠵᠠᠯᡠᠮᠪᡠᠮᡝ᠈ ᡨᡝᡵᡝᡳ ᠮᡠᠵᡳᠨ ᠪᡝ ᡝᠪᡝᡵᡝᠮᠪᡠᠮᡝ᠈
ᡨᡝᡵᡝᡳ ᡤᡳᡵᠠᠩᡤᡳ ᠪᡝ ᡝᡨᡠᡥᡠᡧᡝᠮᡝ᠈ ᡴᡝᠮᡠᠨᡳ ᡳᡵᡤᡝᠰᡝ ᠪᡝ ᠰᠠᡵᠠᠰᡠ ᠠᡴᡡ ᠪᡠᠶᡝᠨ ᠠᡴᡡ ᠣᠪᡠᠮᡝ᠈
ᡨᡝᡵᡝ ᠮᡝᡵᡤᡝᠩᡤᡝ ᠣᠴᡳᠪᡝ ᡤᡝᠯᡥᡠᠨ ᠠᡴᡡ ᠶᠠᠪᡠᠪᡠᡵᠠᡴᡡ᠉ ᡠᡳᠯᡝᠨ ᠠᡴᡡ ᠪᡝ ᠶᠠᠪᡠᠴᡳ᠈
ᡩᠠᠰᠠᠪᡠᡵᠠᡴᡡᠩᡤᡝ ᠠᡴᡡ ᠪᡳᡥᡝᠪᡳ᠉
ᡩᠣᡵᠣ ᠰᡝᠴᡳ ᡴᡠᠮᡩᡠ ᠪᡳᠮᡝ ᠪᠠᡳᡨᠠᠯᠠᡵᠠ ᡩᡝ ᡝᠮᠪᡳᠴᡳ ᠵᠠᠯᡠᠨᡩᠠᡵᠠᡴᡡ ᡤᡝᠰᡝ᠉
ᠮᡠᠮᡳᠨ ᠰᡝᠮᡝ ᡨᡠᠮᡝᠨ ᠵᠠᡴᠠᡳ ᡩᠠ ᡳ ᠠᡩᠠᠯᡳ᠉ ᡨᡝᡵᡝᡳ ᡩᠠᠴᡠᠨ ᠪᡝ ᠮᠣᠨᠵᡳᠪᡠᡶᡳ᠈
ᡨᡝᡵᡝᡳ ᠪᡠᡵᡤᡳᠨ ᠪᡝ ᠰᡠᠪᡠᡶᡳ᠈ ᠴᡝᠰᡝᡳ ᡝᠯᡩᡝᠨ ᡩᡝ ᠠᠴᠠᠪᡠᠮᡝ᠈
ᠴᡝᠰᡝᡳ ᡨᠣᡵᠣᠨ ᡩᡝ ᡠᡥᡝᠯᡝᡵᡝ ᡩᡝ ᠪᠣᠯᡤᠣ ᠰᡝᠮᡝ ᡝᠮᠪᡳᠴᡳ ᡨᠠᡴᠰᡳᡵᡝ ᡤᡝᠰᡝ᠉
ᠪᡳ ᠶᠠ ᠴᡳ ᠪᠠᠨᠵᡳᡵᡝ ᠪᡝ ᠰᠠᡵᡴᡡ᠉ ᠪᡝᠶᡝ ᠴᡳ ᠨᡝᠨᡩᡝᡵᡝ ᡩᡝ ᡩᡠᡵᠰᡠᠯᡝᠮᠪᡳ᠉
ᠠᠪᡴᠠ ᠨᠠ ᡤᠣᠰᡳᠨ ᠠᡵᠠᡵᠠᡴᡡ᠈ ᡨᡠᠮᡝᠨ ᠵᠠᡴᠠ ᠪᡝ ᠰᡠᡳᡨᠠᡵᠠ ᡶᡠᡵᡤᡳ ᠣᠪᡠᡶᡳ ᡨᡠᠸᠠᠮᠪᡳ᠉
ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᡤᠣᠰᡳᠨ ᠠᡵᠠᡵᠠᡴᡡ᠈ ᡨᠠᠩᡤᡡ ᡥᠠᠯᠠᡳ ᡳᡵᡤᡝᠨ ᠪᡝ ᠰᡠᡳᡨᠠᡵᠠ ᡶᡠᡵᡤᡳ ᠣᠪᡠᡶᡳ ᡨᡠᠸᠠᠮᠪᡳ᠉
ᠠᠪᡴᠠ ᠨᠠ ᡳ ᠰᡳᡩᡝᠨ᠈ ᡨᡝᡵᡝ ᠪᡠᠵᡠᡴᡠ ᠰᡳᡥᠠᠨ ᡳ ᠠᡩᠠᠯᡳ ᡩᡝᡵᡝ᠉ ᡴᡠᠮᡩᡠ ᠪᡳᠮᡝ ᡳᡴᡡᡵᠠᡴᡡ᠈
ᡥᡠᠵᡠᡵᡝᠴᡳ ᡝᠯᡝ ᡨᡠᠴᡳᠮᠪᡳ᠉ ᠯᠠᠪᡩᡠ᠉ ᡤᡳᠰᡠᡵᡝᠴᡳ ᡠᡵᡠᡳ ᠶᠠᡩᠠᡵᠠ ᠠᠩᡤᠠᠯᠠ᠈
ᡩᠣᠯᠣ ᠪᡝ ᡨᡠᠸᠠᡴᡳᠶᠠᡵᠠ ᡩᡝ ᡳᠰᡳᡵᠠᡴᡡ᠉
ᡶᡝᡵᡤᡠᠸᡝᠨ ᠪᡝ ᡠᠵᡳᡶᡳ ᠪᡠᡩᡝᡵᠠᡴᡡ᠈ ᡝᡵᡝᠪᡝ ᡴᡠᡥᡝᠨ ᡳ ᡝᡵᡤᡝᠨ ᠰᡝᠮᠪᡳ᠉
ᡴᡠᡥᡝᠨ ᡳ ᡝᡵᡤᡝᠨ ᡳ ᡩᡠᡴᠠ᠈ ᡝᡵᡝᠪᡝ ᠪᠠᠨᠵᡳᠪᡠᡵᡝ ᡶᡠᠰᡝᠮᠪᡠᡵᡝ ᡩᠠ ᠰᡝᠮᠪᡳ᠉
ᠰᡳᡵᡝᠨᡝᠮᡝ ᠰᡳᡵᡝᠨᡝᠮᡝ ᡨᡝᠪᡠᡥᡝ ᡤᡝᠰᡝ᠈ ᠪᠠᡳᡨᠠᠯᠠᡥᠠ ᠰᡝᠮᡝ ᠵᠣᠪᠣᡵᠠᡴᡡ᠉
ᠠᠪᡴᠠ ᡤᠣᠯᠮᡳᠨ᠈ ᠨᠠ ᡤᠣᡳᡩᠠᡨᠠᠯᠠ᠉ ᠠᠪᡴᠠ ᠨᠠ ᡳ ᡤᠣᠯᠮᡳᠨ ᠪᡳᠮᡝ ᡤᠣᡳᡩᠠᡨᠠᠯᠠ ᠣᠮᡝ ᠮᡠᡨᡝᡵᡝᡠᡤᡤᡝ᠈
ᠪᡝᠶᡝ ᠪᠠᠨᠵᡳᡵᠠᡴᡡ ᠣᠵᠣᡵᠣ ᠵᠠᡴᠠᡩᡝ᠈ ᡨᡠᡨᡨᡠ ᡝᠨᡨᡝᡥᡝᠮᡝ ᠪᠠᠨᠵᡳᠮᡝ ᠮᡠᡨᡝᡥᡝᠪᡳ᠉
ᡠᡨᡨᡠ ᠣᡶᡳ ᡝᠨᡩᡠᡵᡳᠠᡤᡤᡝ ᠨᡳᠶᠠᠯᠮᠠ ᡳᠨᡳ ᠪᡝᠶᡝᠪᡝ ᠠᠮᠠᠯᠠ ᠣᠪᡠᡶᡳ ᠨᡝᠮᡝᠮᡝ ᠪᡝᠶᡝ ᠨᡝᠨᡩᡝᡥᡝ᠈
ᡳᠨᡳ ᠪᡝᠶᡝᠪᡝ ᡨᡠᠯᡝ ᠣᠪᡠᡶᡳ ᠨᡝᠮᡝᠮᡝ ᠪᡝᠶᡝ ᡨᠠᡴᠰᡳᡥᠠᠪᡳ᠉
ᡳᠨᡩᡝ ᠴᡳᠰᡠ ᠠᡴᡡ ᡳ ᠵᠠᠯᡳᠨ ᠸᠠᡴᠠ ᠣᡶᡳ᠈ ᡝᠯᡝᠮᠠᠩᡤᠠ ᡳᠨᡳ ᠴᡳᠰᡠ ᠪᡝ ᠮᡠᡨᡝᠪᡠᠮᡝ ᠮᡠᡨᡝᠮᠪᡳ᠉
ᡩᡝᡵᡤᡳ ᠰᠠᡳᠨ ᠪᡝ ᠮᡠᡴᡝ ᠠᡩᠠᠯᡳ᠉ ᠮᡠᡴᡝ ᡨᡠᠮᡝᠨ ᠵᠠᡴᠠ ᡩᡝ ᡨᡠᠰᠠ ᠠᡵᠠᡵᠠ ᠮᠠᠩᡤᠠ ᠪᡳᠮᡝ ᡨᡝᠮᡧᡝᡵᠠᡴᡡ᠉
ᡤᡝᡵᡝᠨ ᠨᡳᠶᠠᠯᠮᠠᡳ ᡠᠪᡳᠶᠠᡵᠠᠩᡤᡝ ᡩᡝ ᡨᡝᠪᡠᠮᡝ ᠣᡶᡳ᠈ ᡨᡠᡨᡨᡠ ᡩᠣᡵᠣ ᡩᡝ ᡥᠠᠮᡳᠨᠠᠮᠪᡳ᠉
ᡨᡝᡵᡝ ᡩᡝ ᠪᠠ ᡳᠯᡳᡵᡝ ᠮᠠᠩᡤᠠ᠈ ᠮᡠᠵᡳᠯᡝᠨ ᡩᡝ ᠮᡠᠮᡳᠨ ᠣᠵᠣᡵᠣ ᠮᠠᠩᡤᠠ᠈
ᠪᡠᡵᡝ ᡩᡝ ᡤᠣᠰᡳᠨ ᠣᠵᠣᡵᠣ ᠮᠠᠩᡤᠠ᠈ ᡤᡳᠰᡠᠨ ᡩᡝ ᠠᡴᡩᡠᠨ ᠣᠵᠣᡵᠣ ᠮᠠᠩᡤᠠ᠈
ᡩᠠᠰᠠᠨ ᡩᡝ ᡩᠠᠰᠠᠪᡠᡵᡝ ᠮᠠᠩᡤᠠ᠈ ᠪᠠᡳᡨᠠ ᡩᡝ ᠮᡠᡨᡝᠩᡤᡝ ᠣᠵᠣᡵᠣ ᠮᠠᠩᡤᠠ᠈
ᠠᡧᡧᠠᡵᠠ ᡩᡝ ᡝᡵᡳᠯᡝᡵᡝ ᠮᠠᠩᡤᠠ᠉ ᡨᡝᡵᡝ ᡩᠠᠮᡠ ᡨᡝᠮᡧᡝᡵᠠᡴᡡ ᠣᡶᡳ᠈ ᡨᡠᡨᡠ ᠸᠠᡴᠠᠯᠠᠨ ᠠᡴᡡ ᠣᠮᠪᡳ᠉
ᡨᡠᡴᡳᠶᡝᡶᡳ ᠵᠠᠯᡠᠮᠪᡠᡵᡝᠩᡤᡝ ᠨᠠᡴᠠᡵᠠ ᡩᡝ ᡳᠰᡳᡵᠠᡴᡡ᠉
ᡥᡳᠰᡥᠠᡶᡳ ᡩᠠᠴᡠᠨ ᠣᠪᡠᡵᡝᠩᡤᡝ ᡝᠨᡨᡝᡥᡝᠮᡝ ᡴᠠᡵᠮᠠᠴᡳ ᠣᠵᠣᡵᠠᡴᡡ᠉
ᠠᡳᠰᡳᠨ ᡤᡠ ᠪᠣᠣ ᡩᡝ ᠵᠠᠯᡠᠴᡳᠪᡝ᠈ ᡴᠠᡵᠮᠠᠮᡝ ᠮᡠᡨᡝᡵᡝᠩᡤᡝ ᠠᡴᡡ᠉
ᠪᠠᠶᠠᠨ ᠸᡝᠰᡳᡥᡠᠨ ᠪᡳᠮᡝ ᠴᠣᡴᡨᠣ ᠣᠴᡳ᠈ ᠪᡝᠶᡝ ᡝᠨᡩᡝᠪᡠᡴᡠ ᡩᡝ ᡨᡠᡥᡝᠪᡠᠮᠪᡳ᠉
ᡤᡠᠩᡤᡝ ᠮᡠᡨᡝᠪᡠᡶᡳ ᡤᡝᠪᡠ ᠪᠠᡥᠠ ᠮᠠᠩᡤᡳ ᠪᡝᠶᡝ ᠪᡝᡩᡝᡵᡝᡵᡝᠣᡤᡤᡝ᠈ ᠠᠪᡴᠠᡳ ᡩᠣᡵᠣ ᡴᠠᡳ᠉
ᡤᡠᠪᠴᡳ ᠣᡵᠣᠨ ᠪᡝ ᡨᡝᠪᡠᡶᡳ᠈ ᡝᠮᡠ ᠪᡝ ᡨᡝᠪᡝᠯᡳᠶᡝᡵᡝ ᡩᡝ ᠠᠯᠵᠠᡵᠠᡴᡡ ᠣᠮᡝ ᠮᡠᡨᡝᠮᠪᡳᠣ᠉
ᠰᡠᡴᡩᡠᠨ ᠪᡝ ᡤᡳᡩᠠᡶᡳ ᡤᡝᠩᡤᡝᠨ ᡩᡝ ᡳᠰᡳᠪᡠᡵᡝ ᡩᡝ ᡥᡠᡥᡠᡵᡳ ᠵᡠᡳ ᡳ ᠠᡩᠠᠯᡳ ᠣᠮᡝ ᠮᡠᡨᡝᠮᠪᡳᠣ᠉
ᡶᡝᡵᡤᡠᠸᡝᠴᡠᠨ ᡨᡠᠸᠠᠪᡠᠨ ᠪᡝ ᠰᡳᠯᡤᡳᠶᠠᠮᡝ ᡤᡝᡨᡝᡵᡝᠮᠪᡠᡵᡝ ᡩᡝ ᡳᠴᡳᡥᡳ ᠠᡴᡡ ᠣᠮᡝ ᠮᡠᡨᡝᠮᠪᡳᠣ᠉
ᡳᡵᡤᡝᠨ ᠪᡝ ᡤᠣᠰᡳᡵᡝ ᡤᡠᡵᡠᠨ ᠪᡝ ᡩᠠᠰᠠᡵᠠ ᡩᡝ ᡠᡳᠯᡝᠨ ᠠᡴᡡ ᠣᠮᡝ ᠮᡠᡨᡝᠮᠪᡳᠣ᠉
ᠠᠪᡴᠠᡳ ᡩᡠᡴᠠ ᠨᡝᡳᡵᡝ ᠶᠠᡴᠰᡳᡵᡝ ᡩᡝ ᡝᠮᡳᠯᡝ ᠣᠮᡝ ᠮᡠᡨᡝᠮᠪᡳᠣ᠉
ᡤᡝᠩᡤᡳᠶᡝᠨ ᡤᡝᡨᡠᡴᡝᠨ ᡩᡠᡳᠨ ᡝᡵᡤᡳ ᡥᠠᡶᡠᠨᠠᡵᠠ ᡩᡝ ᠰᠠᡵᠠᠰᡠ ᠠᡴᡡ ᠣᠮᡝ ᠮᡠᡨᡝᠮᠪᡳᠣ᠉
ᠪᠠᠨᠵᡳᠪᡠᠮᡝ ᡠᠵᡳᠪᡠᠮᡝ᠈ ᠪᠠᠨᠵᡳᠮᠪᡳᠮᡝ ᠪᡳᠰᡳᡵᠠᡴᡡ᠈ ᠶᠠᠪᡠᠮᠪᡳᠮᡝ ᡝᡵᡨᡠᡵᠠᡴᡡ᠈
ᡨᡠᡵᡠᠯᠠᠮᠪᡳᠮᡝ ᡩᡝ ᠠᡵᠠᡵᠠᡴᡡ᠈ ᡝᡵᡝᠪᡝ ᡶᡝᡵᡤᡠᠸᡝᠴᡠᠨ ᡝᡵᡩᡝᠮᡠ ᠰᡝᠮᠪᡳ᠉
ᡤᠣᠰᡳᠨ ᡥᡝᡵᡠ ᠪᡝ ᡝᠮᡠ ᠪᡠᠯᡠᠨ ᠠᠴᠠᠮᠵᡳᡶᡳ᠈ ᡨᡝᡵᡝ ᠠᡴᡡ ᠪᡝ ᡩᠠᡥᠠᠮᡝ ᠰᡝᠵᡝᠨ ᡳ ᠪᠠᡳᡨᠠᠯᠠᠨ ᠪᡳ᠉
ᠴᡳᡶᠠᡥᠠ ᠪᡝ ᠰᡠᡳᠮᡝ ᡨᡝᡨᡠᠨ ᠸᡝᡳᠯᡝᡶᡳ᠈ ᡨᡝᡵᡝ ᠠᡴᡡ ᠪᡝ ᡩᠠᡥᠠᠮᡝ ᡨᡝᡨᡠᠨ ᡳ ᠪᠠᡳᡨᠠᠯᠠᠨ ᠪᡳ᠉
ᡠᠴᡝ ᡶᠠ ᠪᡝ ᠨᡝᡳᠮᡝ ᠪᠣᠣ ᠠᡵᠠᡶᡳ᠈ ᡨᡝᡵᡝ ᠠᡴᡡ ᠪᡝ ᡩᠠᡥᠠᠮᡝ ᠪᠣᠣ ᡳ ᠪᠠᡳᡨᠠᠯᠠᠨ ᠪᡳ᠉
ᡨᡠᡨᡨᡠ ᠣᡶᡳ ᠪᡳᠰᡳᡵᡝᠩᡤᡝ ᠪᡝ ᠠᡳᠰᡳ ᠣᠪᡠᠮᠪᡳ᠈ ᠠᡴᡡᠩᡤᡝ ᠪᡝ ᠪᠠᡳᡨᠠᠯᠠᠨ ᠣᠪᡠᠮᠪᡳ᠉
ᠰᡠᠨᠵᠠ ᠪᠣᠴᠣ ᠣᡶᡳ᠈ ᠨᡳᠶᠠᠯᠮᠠᡳ ᠶᠠᠰᠠ ᠪᡝ ᡩᡝᡵᡳᡴᡝ ᠣᠪᡠᠮᠪᡳ᠉
ᠰᡠᠨᠵᠠ ᠮᡠᡩᠠᠨ ᠣᡶᡳ᠈ ᠨᡳᠶᠠᠯᠮᠠᡳ ᡧᠠᠨ ᠪᡝ ᠵᡳᡤᡝᠶᡝᠨ ᠣᠪᡠᠮᠪᡳ᠉
ᠰᡠᠨᠵᠠ ᠠᠮᡨᠠᠨ ᠣᡶᡳ᠈ ᠨᡳᠶᠠᠯᠮᠠᡳ ᠠᠩᡤᠠ ᠪᡝ ᡤᠠᠪᡠᠯᠠ ᠣᠪᡠᠮᠪᡳ᠉
ᡶᡝᡴᠰᡳᠮᡝ ᡧᠣᡩᠣᠮᡝ ᠠᠪᠠᠯᠠᠮᡝ ᠣᡶᡳ᠈ ᠨᡳᠶᠠᠯᠮᠠᡳ ᠮᡠᠵᡳᠯᡝᠨ ᠪᡝ ᠰᠣᡶᡳᠨ ᠠᡴᡡ ᠣᠪᡠᠮᠪᡳ᠉
ᠪᠠᡥᠠᡵᠠ ᡩᡝ ᠮᠠᠩᡤᠠ ᠵᠠᡴᠠ ᠣᡶᡳ᠈ ᠨᡳᠶᠠᠯᠮᠠᡳ ᠶᠠᠪᡠᠨ ᠪᡝ ᠰᡳᠯᡥᡳᠩᡤᠠ ᠣᠪᡠᠮᠪᡳ᠉
ᡠᡨᡨᡠ ᠣᡶᡳ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᡥᡝᡶᡝᠯᡳ ᡳ ᠵᠠᠯᡳᠨ ᡥᠠᡧᠠᠮᠪᡳ᠈
ᠶᠠᠰᠠ ᡳ ᠵᠠᠯᡳᠨ ᡥᠠᡧᠠᡵᠠᡴᡡ᠉ ᡨᡠᡨᡨᡠ ᡨᡝᡵᡝᠪᡝ ᠸᠠᠯᡳᠶᠠᠮᠪᡳ᠈ ᡝᡵᡝᠪᡝ ᡤᠠᡳᠮᠪᡳ᠉
ᡩᡝᡵᡝᠩᡤᡝ ᡤᡳᡵᡠᠴᡠᠨ ᡤᡡᠸᠠᠴᡳᡥᡳᠶᠠᠯᠠᡵᠠ ᠠᡩᠠᠯᡳ᠈ ᠪᡝᠶᡝᠪᡝ ᠠᠮᠪᠠ ᠵᠣᠪᠣᠴᡠᠨ ᠠᡩᠠᠯᡳ ᠣᠪᡠᠴᡳ ᠮᠠᠩᡤᠠ᠉
ᡩᡝᡵᡝᠩᡤᡝ ᡤᡳᡵᡠᠴᡠᠨ ᡤᡡᠸᠠᠴᡳᡥᡳᠶᠠᠯᠠᡵᠠ ᠠᡩᠠᠯᡳ ᠰᡝᡵᡝᠩᡤᡝ ᠠᡩᠠᡵᠠᠮᡝ᠉ ᡩᡝᡵᡝᠩᡤᡝ ᠪᡝ ᠸᡝᠰᡳᡥᡠᠨ ᠣᠪᡠᠮᠪᡳ᠈
ᡤᡳᡵᡠᠴᡠᠨ ᠪᡝ ᡶᡠᠰᡳᡥᡡᠨ ᠣᠪᡠᠮᠪᡳ᠉ ᠪᠠᡥᠠᡵᠠ ᡩᡝ ᡤᡡᠸᠠᠴᡳᡥᡳᠶᠠᠯᠠᡵᠠ ᠠᡩᠠᠯᡳ᠈ ᡠᡶᠠᡵᠠᡵᠠ ᡩᡝ ᡤᡡᠸᠠᠴᡳᡥᡳᠶᠠᠯᠠᡵᠠ ᠠᡩᠠᠯᡳ᠉
ᡝᡵᡝᠪᡝ ᡩᡝᡵᡝᠩᡤᡝ ᡤᡳᡵᡠᠴᡠᠨ ᡤᡡᠸᠠᠴᡳᡥᡳᠶᠠᠯᠠᡵᠠ ᠠᡩᠠᠯᡳ ᠰᡝᠮᠪᡳ᠉ ᠪᡝᠶᡝᠪᡝ ᠠᠮᠪᠠ ᠵᠣᠪᠣᠴᡠᠨ ᠠᡩᠠᠯᡳ ᠣᠪᡠᠴᡳ
ᠮᠠᠩᡤᠠ ᠰᡝᡵᡝᠩᡤᡝ ᠠᡩᠠᡵᠠᠮᡝ᠉ ᠮᡳᠨᡩᡝ ᠠᠮᠪᠠ ᠵᠣᠪᠣᠴᡠᠨ ᠪᡳᠰᡳᡵᡝᠩᡤᡝ᠈ ᠮᡳᠨᡩᡝ ᠪᡝᠶᡝ ᠪᡳᠰᡳᡵᡝ ᠵᠠᠯᡳᠨ᠉
ᠮᡳᠨᡩᡝ ᠪᡝᠶᡝ ᠠᡴᡡ ᠣᠪᡠᡶᡳ ᡨᡠᠸᠠᠴᡳ᠈ ᠮᡳᠨᡩᡝ ᠠᡳ ᠵᠣᠪᠣᡵᠣ ᠪᠠᠪᡳ᠉ ᡨᡠᡨᡨᡠ ᠣᡶᡳ ᠪᡝᠶᡝ ᡳ ᠠᠪᡴᠠᡳ ᡶᡝᠵᡝᡵᡤᡳ ᠪᡝ
ᡩᠠᠰᠠᡵᠠ ᡩᡝ ᠸᡝᠰᡳᡥᡠᠯᡝᠴᡳ᠈ ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᠨᡳᡴᡝᠪᡠᠴᡳ ᠣᠮᠪᡳ᠉
ᠪᡝᠶᡝ ᡳ ᠠᠪᡴᠠᡳ ᡶᡝᠵᡝᡵᡤᡳ ᠪᡝ ᡩᠠᠰᠠᡵᠠ ᡩᡝ ᡥᠠᡳᡵᠠᠴᡳ᠈ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᠠᡶᠠᠪᡠᠴᡳ ᠣᠮᠪᡳ᠉
ᡨᡠᠸᠠᡶᡳ ᠰᠠᠪᡠᡵᠠᡴᡡ ᠪᡝ ᡤᡝᡵᡳ ᠰᡝᠮᡝ ᡤᡝᠪᡠᠯᡝᠮᠪᡳ᠉
ᡩᠣᠨᠵᡳᡶᡳ ᡩᠣᠨᠵᡳᡵᠠᡴᡡ ᠪᡝ ᡶᠠᡵᡳ ᠰᡝᠮᡝ ᡤᡝᠪᡠᠯᡝᠮᠪᡳ᠉
ᠵᠠᡶᠠᡶᡳ ᠪᠠᡥᠠᡵᠠᡴᡡ ᠪᡝ ᠰᡝᡵᡳ ᠰᡝᠮᡝ ᡤᡝᠪᡠᠯᡝᠮᠪᡳ᠉
ᡝᡵᡝ ᡳᠯᠠᠨ ᡥᠠᠴᡳᠨ ᠰᡝᡵᡝᠩᡤᡝ ᠰᡳᠪᡴᡳᠮᡝ ᡳᠰᡳᠪᡠᠴᡳ ᠣᠵᠣᡵᠠᡴᡡ ᠣᡶᡳ᠈
ᡨᡠᡨᡨᡠ ᡝᠮᡠ ᠣᠪᡠᠮᡝ ᡶᡠᠮᡝᡵᡝᠮᠪᡳ᠉
ᡨᡝᡵᡝᡳᡩᡝᡵᡤᡳ ᡝᠯᡩᡝᡵᠠᡴᡡ᠈ ᡨᡝᡵᡝᡳ ᡶᡝᠵᡝᡵᡤᡳ ᠪᡠᡵᡠᠪᡠᡵᠠᡴᡡ᠉
ᡤᠣᡵᠣᠮᡳᠮᡝ ᠰᡝᡥᡝᡳ ᡤᡝᠪᡠᠯᡝᠴᡳ ᠣᠵᠣᡵᠠᡴᡡ᠉
ᠵᠠᡴᠠ ᠠᡴᡡ ᡩᡝ ᡩᠠᡥᡡᠮᡝ ᠪᡝᡩᡝᡵᡝᠪᡠᠮᠪᡳ᠈ ᡝᡵᡝᠪᡝ ᠮᡠᡵᡠ ᠠᡴᡡ ᡳ ᠮᡠᡵᡠ ᠰᡝᠮᠪᡳ᠉
ᠠᡵᠪᡠᠨ ᠠᡴᡡ ᡳ ᠠᡵᠪᡠᠨ᠈ ᡝᡵᡝᠪᡝ ᠪᡠᡵᡠ ᠪᠠᡵᠠ ᠰᡝᠮᠪᡳ᠉
ᠣᡴᡩᠣᡶᡳ ᡨᡝᡵᡝᡳ ᡠᠵᡠ ᠪᡝ ᠰᠠᠪᡠᡵᠠᡴᡡ᠈ ᡩᠠᡥᠠᠯᠠᡶᡳ ᡨᡝᡵᡝᡳ ᠠᠮᠠᠯᠠ ᠪᡝ ᠰᠠᠪᡠᡵᠠᡴᡡ᠉ ᠵᡠᠯᡤᡝᡳ ᡩᠣᡵᠣ ᠪᡝ ᠵᠠᡶᠠᡶᡳ᠈ ᡨᡝ ᡳ ᠪᡳᠰᡳᡵᡝ ᠪᡝ ᡩᠠᠰᠠᠴᡳ᠈ ᠵᡠᠯᡤᡝᡳ ᡩᡝᡵᡳᠪᡠᠨ ᠰᡝᠮᡝ ᠮᡠᡨᡝᠮᠪᡳ᠉ ᡝᡵᡝᠪᡝ ᡩᠣᡵᠣ ᡥᡝᡵᡤᡳᠨ ᠰᡝᠮᠪᡳ᠉
ᠵᡠᠯᡤᡝᡳ ᡩᠣᡵᠣ ᡨᠠᠴᡳᡵᡝ ᠮᠠᠩᡤᠠ ᡠᡵᠰᡝ᠈ ᠨᠠᡵᡥᡡᠨ ᡶᡝᡵᡤᡠᠸᡝᠴᡠᡴᡝ ᡶᡝᡵᡤᡠᠸᡝᠴᡠᠨ ᡥᠠᡶᡠ᠈
ᡧᡠᠮᡳᠨ ᠣᠵᠣᡵᠣᠩᡤᡝ ᡠᠯᡥᡳᠴᡳ ᠣᠵᠣᡵᠠᡴᡡᠣ ᠪᡳᡥᡝᠪᡳ᠉ ᡨᡝᡵᡝ ᡩᠠᠮᡠ ᡠᠯᡥᡳᠴᡳ ᠣᠵᠣᡵᠠᡴᡡ ᠣᡶᡳ᠈
ᡨᡠᡨᡨᡠ ᡥᠠᠴᡳᡥᡳᠶᠠᠮᡝ ᠠᡵᠪᡠᡧᠠᠮᡝ᠈ ᡨᠠᡨᡥᡡᠨᠵᠠᡵᠠᠩᡤᡝ ᡨᡠᠸᡝᡵᡳ ᠪᡳᡵᠠ ᠪᡝ ᡩᠣᠣᡵᡝ ᠠᡩᠠᠯᡳ᠈
ᡴᡝᠨᡝᡥᡠᠨᠵᡝᡵᡝᠩᡤᡝ ᡩᡠᡳᠨ ᠠᡩᠠᡴᡳ ᠪᡝ ᡤᡝᠯᡝᡵᡝ ᠠᡩᠠᠯᡳ᠈ ᡨᠣᠪ ᠰᡝᡵᡝᠩᡤᡝ ᠠᠨᡨᠠᡥᠠ ᠠᡩᠠᠯᡳ᠈
ᠰᠠᠮᠰᡳᡵᡝᠩᡤᡝ ᠵᡠᡴᡝ ᡳ ᠸᡝᠨᡩᡝᠮᡝ ᡥᠠᠮᡳᡴᠠ ᠠᡩᠠᠯᡳ᠈ ᡤᡠᠯᡠ ᠣᠵᠣᡵᠣᠩᡤᡝ ᡨᡝᠨᡨᡝᡴᡝ ᡤᡠᠯᡥᡠᠨ ᡳ ᠠᡩᠠᠯᡳ᠈
ᡴᡡᠸᠠᠩᡨᠠᠪᡡᠨ ᠣᠵᠣᡵᠣᠩᡤᡝ ᡨᡝᠨᡨᡝᡴᡝ ᡥᠣᠯᠣ ᡳ ᠠᡩᠠᠯᡳ᠈ ᡶᡠᠮᡝᡵᡝᡵᡝᠩᡤᡝ ᡨᡝᠨᡨᡝᡴᡝ ᡩᡠᡵᠠᠩᡤᡳ ᡳ ᠠᡩᠠᠯᡳ᠉
ᡳᠯᡳᠮᠪᠠᡥᠠ ᡩᡝ ᡩᡠᡵᠠᠩᡤᡳ ᠪᡝ ᡨᡝᡶᡳ ᠴᡳᠪᠰᡝᠮᡝ ᡝᠯᡥᡝᡴᡝᠨ ᡳ ᡤᡝᠩᡤᡳᠶᡝᠨ ᠣᠮᠪᡳ᠉
ᡳᠯᡳᠮᠪᠠᡥᠠ ᡩᡝ ᡝᠯᡥᡝ ᠣᠮᡝ ᡤᠣᡳᡩᠠᡶᡳ ᠠᡧᡧᠠᠮᡝ ᡝᠯᡥᡝᡴᡝᠨ ᡳ ᠪᠠᠨᠵᡳᠮᡝ ᠮᡠᡨᡝᠮᠪᡳ᠉
ᡝᡵᡝ ᡩᠣᡵᠣ ᠪᡝ ᡴᠠᡵᠮᠠᡵᠠᠩᡤᡝ ᠵᠠᠯᡠᠨᡩᠠᡵᠠ ᠪᡝ ᠪᡠᠶᡝᡵᠠᡴᡡ᠉ ᡨᡝᡵᡝ ᡩᠠᠮᡠ ᠵᠠᠯᡠᠨᡩᠠᡵᠠᡴᡡ ᠣᡶᡳ᠈
ᡨᡠᡨᡨᡠ ᡶᡝ ᡩᡝ ᡩᠣᠰᠣᠮᡝ ᡳᠴᡝ ᠮᡠᡨᡝᠪᡠᡵᠠᡴᡡ
ᡴᡠᠮᡩᡠ ᡩᡝ ᡳᠰᡳᠪᡠᡵᡝᠩᡤᡝ ᡨᡝᠨ᠈ ᠴᡳᠪᠰᡝᠨ ᠪᡝ ᡨᡠᠸᠠᡴᡳᠶᠠᡵᠠᠩᡤᡝ ᡨᡝᠩ᠉
ᡨᡠᠮᡝᠨ ᠵᠠᡴᠠ ᠰᠠᠰᠠ ᡩᡝᡵᡳᠪᡠᠴᡳ᠈ ᠮᡠᠰᡝ ᡝᡵᡝᠨᡳ ᡨᡝᡵᡝᡳ ᡩᠠᡥᡡᠮᡝ ᠪᡝ ᠴᡳᠨᠴᡳᠯᠠᠮᠪᡳ᠉
ᡨᡝᡵᡝ ᠵᠠᡴᠠᡳ ᠯᡝᡵ ᠯᡝᡵ ᠰᡝᡵᡝᠩᡤᡝ᠈ ᠮᡝᡳᠮᡝᠨᡳ ᡨᡝᡵᡝᡳ ᡩᠠ ᡩᡝ ᠪᡝᡩᡝᡵᡝᠪᡠᠮᠪᡳ᠉
ᡩᠠ ᡩᡝ ᠪᡝᡩᡝᡵᡝᠪᡠᡵᡝ ᠪᡝ ᠴᡳᠪᠰᡝᠨ ᠰᡝᠮᠪᡳ᠉ ᠴᡳᠪᠰᡝᠨ ᠪᡝ ᡝᡵᡤᡝᠨ ᡩᠠᡥᡡᠮᠪᡳ ᠰᡝᠮᠪᡳ᠉
ᡝᡵᡤᡝᠨ ᡩᠠᡥᡡᡵᡝ ᠪᡝ ᡝᠨᡨᡝᡥᡝᠮᡝ ᠰᡝᠮᠪᡳ᠉ ᡝᠨᡨᡝᡥᡝᠮᡝ ᠰᠠᡥᠠ ᠪᡝ ᡤᡝᠩᡤᡳᠶᡝᠨ ᠰᡝᠮᠪᡳ᠉
ᡝᠨᡨᡝᡥᡝᠮᡝ ᠪᡝ ᠰᠠᡵᡴᡡ ᠪᠠᠯᠠᡳ ᡩᡝᡵᡳᠪᡠᠴᡳ ᡝᡥᡝ ᠣᠮᠪᡳ᠉ ᡝᠨᡨᡝᡥᡝᠮᡝ ᠪᡝ ᠰᠠᠴᡳ ᠪᠠᡴᡨᠠᠮᠪᡠᠮᠪᡳ᠉
ᠪᠠᡴᡨᠠᠮᠪᡠᡥᠠ ᠮᠠᠩᡤᡳᡨᠣᠨᡩᠣ ᠣᠮᠪᡳ᠉ ᡨᠣᠨᡩᠣ ᠣᡥᠣ ᠮᠠᠩᡤᡳ ᡝᠵᡝᠨ ᠣᠮᠪᡳ᠉
ᡝᠵᡝᠨ ᠣᡥᠣ ᠮᠠᠩᡤᡳ ᠠᠪᡴᠠ ᠣᠮᠪᡳ᠉ ᠠᠪᡴᠠ ᠣᡥᠣ ᠮᠠᠩᡤᡳ ᡩᠣᡵᠣ ᠣᠮᠪᡳ᠉
ᡩᠣᡵᠣ ᠣᡥᠣ ᠮᠠᠩᡤᡳ ᡤᠣᡳᡩᠠᠮᠪᡳ᠉ ᠪᡝᠶᡝ ᡨᡠᡥᡝᠨᡨᡝᠯᡝ ᡨᡠᡴᠰᡳᠴᡠᡴᡝ ᠠᡴᡡ᠉
ᡠᠮᡝᠰᡳ ᡩᡝᠯᡝᠩᡤᡝ ᡶᡝᠵᡝᡵᡤᡳ ᡠᡵᠰᡝ ᠪᡳᠰᡳᡵᡝ ᠪᡝ ᠰᠠᠮᠪᡳ᠉ ᡨᡝᡵᡝᡳ ᠰᡳᡵᠠᠮᡝᠩᡤᡝ ᡥᠠᠵᡳᠯᠠᠮᠪᡳ ᠮᠠᡴᡨᠠᠮᠪᡳ᠉
ᡨᡝᡵᡝᡳ ᠰᡳᡵᠠᠮᡝᠩᡤᡝ ᠣᠯᡥᠣᠮᠪᡳ ᠣᡳᡥᠣᡵᡳᠯᠠᠮᠪᡳ᠉ ᠠᡴᡩᡠᠨ ᡨᡝᠰᡠᡵᠠᡴᡡ ᠣᡶᡳ᠈ ᠠᡴᡩᠠᡵᠠᡴᡡᠩᡤᡝ ᠪᡳ᠉
ᡴᡝᠮᡠᠨᡳ ᡨᡝᡵᡝᡳ ᡤᡳᠰᡠᠨ ᠪᡝ ᠸᡝᠰᡳᡥᡠᠯᡝᠮᠪᡳ᠉ ᡤᡠᠩᡤᡝ ᠮᡠᡨᡝᠪᡠᡶᡳ ᠪᠠᡳᡨᠠ ᡧᠠᠩᡤᠠᡥᠠ ᠮᠠᠩᡤᡳ᠈
ᡨᠠᠩᡤᡡ ᡥᠠᠯᠠᡳ ᡳᡵᡤᡝᠨ ᡤᡝᠮᡠ ᠮᡝᠮᠪᡝ ᡳᠨᡳ ᠴᡳᠰᡠᡳ ᠪᠠᠨᠵᡳᠨᠠᡥᠠ ᠰᡝᠮᠪᡳ᠉
ᠠᠮᠪᠠ ᡩᠣᡵᠣ ᠸᠠᠯᡳᠶᠠᡥᠠ ᡩᡝ ᡤᠣᠰᡳᠨ ᠵᡠᡵᡤᠠᠨ ᠪᡳ᠉
ᠮᡝᡵᡤᡝᠨ ᡠᠯᡥᡳᠰᡠ ᡨᡠᠴᡳᡴᡝ ᡩᡝ ᠠᠮᠪᠠ ᡥᠣᠯᠣ ᠪᡳ᠉
ᠨᡳᠩᡤᡠᠨ ᠨᡳᠶᠠᠮᠠᠨ ᡥᡡᠸᠠᠯᡳᠶᠠᠰᡠᠨ ᠠᡴᡡ ᡩᡝ ᡥᡳᠶᠣᠣᡧᡠᠨ ᠵᡳᠯᠠᠨ ᠪᡳ᠉
ᡤᡠᡵᡠᠨ ᠪᠣᠣ ᡶᠠᡵᡥᡡᠨ ᡶᠠᠴᡠᡥᡡᠨ ᡩᡝ ᡨᠣᠨᡩᠣ ᠠᠮᠪᠠᠨ ᠪᡳ᠉
ᡝᠨᡩᡠᡵᡳᠩᡤᡝ ᠪᡝ ᠠᠰᡥᡡᡵᡝ ᠮᡝᡵᡤᡝᠨ ᠪᡝ ᠸᠠᠯᡳᠶᠠᡵᠠ ᠣᠴᡳ᠈ ᡳᡵᡤᡝᠨ ᡳ ᠠᡳᠰᡳ ᡨᠠᠩᡤᡡ ᡠᠪᡠ ᠣᠮᠪᡳ᠉
ᡤᠣᠰᡳᠨ ᠪᡝ ᠠᠰᡥᡡᡵᡝ ᠵᡠᡵᡤᠠᠨ ᠪᡝ ᠸᠠᠯᡳᠶᠠᡵᠠ ᠣᠴᡳ᠈ ᡳᡵᡤᡝᠨ ᡥᡳᠶᠣᠣᡧᡠᠨ ᠵᡳᠯᠠᠨ ᡩᡝ ᡩᠠᡥᡡᠮᠪᡳ᠉
ᡶᠠᡴᠰᡳ ᠪᡝ ᠠᠰᡥᡡᡵᡝ ᠠᡳᠰᡳ ᠪᡝ ᠸᠠᠯᡳᠶᠠᡵᠠ ᠣᠴᡳ᠈ ᡥᡡᠯᡥᠠ ᡥᠣᠯᠣ ᠠᡴᡡ ᠣᠮᠪᡳ᠉
ᡝᡵᡝ ᡳᠯᠠᠨ ᡥᠠᠴᡳᠨ ᠰᡝᡵᡝᠩᡤᡝ᠈ ᡧᡠ ᡨᡝᠰᡠᡵᠠᡴᡡ ᠣᠵᠣᡵᠣ ᠵᠠᡴᠠᡩᡝ᠈ ᡨᡠᡨᡨᡠ ᡩᠠᠶᠠᠨᠠᡵᠠ ᠪᠠ ᠪᡳᠰᡳᡵᡝ ᡩᡝ ᡳᠰᡳᠪᡠᡥᠠ᠈
ᡤᡠᠯᡠ ᠪᡝ ᡳᠯᡝᡨᡠᠯᡝᡵᡝ ᡤᡠᠯᡥᡠᠨ ᠪᡝ ᡨᡠᠸᠠᡴᡳᠶᠠᡵᠠ ᠣᡥᠣᡩᡝ᠈ ᠴᡳᠰᡠ ᡨᠣᠩᡤᠠ ᠪᡠᠶᡝᠨ ᡴᠣᠮᠰᠣ ᠣᡥᠣ᠉
ᡨᠠᠴᡳᠨ ᠪᡝ ᠠᠰᡥᡡᡶᡳ ᠵᠣᠪᠣᠴᡠᠨ ᠠᡴᡡ᠉ ᠵᡝ ᡳ ᡝ ᠴᡳ ᡳᠰᡥᡠᠨᡩᡝ ᠰᠠᠩᡴᠠᠩᡤᡝ ᡤᡳᠶᠠᠨᠠᡴᡡ ᡠᡩᡠ᠉
ᠰᠠᡳᠨ ᡳ ᡝᡥᡝ ᠴᡳ ᡳᠰᡥᡠᠨᡩᡝ ᠰᠠᠩᡴᠠᠩᡤᡝ ᠠᠨᡨᠠᡴᠠ ᡨᡠᡨᡨᡠ᠉ᠨᡳᠶᠠᠯᠮᠠᡳ ᠣᠯᡥᠣᡵᠣᠩᡤᡝ ᠣᠯᡥᠣᡵᠠᡴᡡ ᠣᠴᡳ ᠣᠵᠣᡵᠠᡴᡡ᠉
ᠯᡝᠯᡳ ᡴᠠᡳ ᡨᡝᡵᡝ ᡩᡠᠪᡝ ᠠᡴᡡ ᠨᡳ᠉ ᡤᡝᡵᡝᠨ ᠨᡳᠶᠠᠯᠮᠠ ᠯᡝᡵ ᠯᡝᡵ ᠰᠣᠮᡝ᠈ ᠠᠮᡨᠠᠩᡤᠠ ᠵᠠᡴᠠ ᠪᡝ ᠵᡝᡨᡝᡵᡝ ᡤᡝᠰᡝ᠈
ᠰᡳᠮᡝᠩᡤᡝ ᡨᡠᠸᠠᠪᡠᠨ ᠪᡝ ᡨᡠᠸᠠᡵᠠ ᡤᡝᠰᡝ᠉ ᠮᡳᠨᡳ ᡨᡝᡳᠯᡝ ᡥᡳᠴᠠᠨ ᠰᡝᠮᡝ᠈ ᡨᡝᡵᡝ ᠠᡧᡧᠠᠯᠠᡥᠠ ᠪᠠ ᠠᡴᡡ᠉
ᠪᡠᡥᡠᡵᡳ ᠵᡠᡳ ᡳ ᠮᡠᡨᡠᡵᡝ ᡠᠨᡩᡝ ᡤᡝᠰᡝ᠉ ᡶᡝᠮᡝ ᡶᡝᠮᡝ ᠪᡝᡩᡝᡵᡝᡵᡝ ᠪᠠ ᠠᡴᡡ ᠠᡩᠠᠯᡳ᠉
ᡤᡝᡵᡝᠨ ᠨᡳᠶᠠᠯᠮᠠ ᡤᡝᠮᡠ ᡶᡠᠨᠴᡝᡨᡝᠯᡝ ᠪᡳᠮᠪᡳᠮᡝ᠈ ᠮᡳᠨᡳ ᡨᡝᡳᠯᡝ ᠮᡝᠯᡝᠪᡠᡥᡝ ᠠᡩᠠᠯᡳ᠈
ᠪᡳ ᠮᡝᠨᡨᡠᡥᡠᠨ ᠨᡳᠶᠠᠯᠮᠠᡳ ᠮᡠᠵᡳᠯᡝᠨ ᠨᡳᠣ᠉ ᡥᡡᠯᡠᡵᡳ ᡥᡡᠯᡠᡵᡳ ᠰᡝᠮᡝ᠉
ᡤᡝᡵᡝᠨ ᠨᡳᠶᠠᠯᠮᠠ ᡤᡝᡨᡠᡴᡝᠨ ᡤᡝᡨᡠᡴᡝᠨ᠈ ᠮᡳᠨᡳ ᡨᡝᡳᠯᡝ ᡥᡡᠯᡥᡳ ᠠᡩᠠᠯᡳ᠉
ᡤᡝᡵᡝᠨ ᠨᡳᠶᠠᠯᠮᠠ ᡴᡳᠮᠴᡳᠨ ᡴᡳᠮᠴᡳᠨ᠈ ᠮᡳᠨᡳ ᡨᡝᠯᡳᡝ ᠮᡠᠨᠠᡥᡡᠨ ᠮᡠᠨᠠᡥᡡᠨ ᠰᡝᠮᡝ᠈
ᠮᡝᡩᡝᡵᡳ ᡩᡝ ᠠᡳᠯᡳᠨᠠᡵᠠ ᠠᡩᠠᠯᡳ᠈ ᡤᠣᡵᠣ ᡴᠠᡳ ᡳᠯᡳᠨᠠᡵᠠ ᠪᠠ ᠠᡴᡡ ᠠᡩᠠᠯᡳ᠉ ᡤᡝᡵᡝᠨ ᠨᡳᠶᠠᠯᠮᠠ ᡤᡝᠮᡠ ᠪᠠᡳᡨᠠᠯᠠᠨ ᠪᡳ᠈ ᠮᡳᠨᡳ ᡨᡝᡳᠯᡝ ᠮᡝᠨᡨᡠᡥᡠᠨ ᠰᠣᡶᠣᠶᠣᠨ ᡳ ᠠᡩᠠᠯᡳ᠉ ᠮᡳᠨᡳ ᡨᡝᡳᠯᡝ ᠨᡳᠶᠠᠯᠮᠠ ᠴᡳ ᡝᠨᠴᡠ ᠪᡳᠮᡝ᠈ ᡝᠮᡝ ᡩᡝ ᡠᠯᡝᠪᡠᡵᡝ ᡶᠣᠨ ᠪᡝ ᠸᡝᠰᡳᡥᡠᠯᡝᠮᠪᡳ᠉
ᠠᠮᠪᠠ ᡝᡵᡩᡝᠮᡠ ᡳ ᠠᡵᠪᡠᡧᠠᡵᠠᠩᡤᡝ᠈ ᡩᠠᠮᡠ ᡩᠣᡵᠣ ᡳ ᡩᠠᡥᠠᠮᠪᡳ᠉
ᡩᠣᡵᠣ ᠰᡝᡵᡝ ᠵᠠᡴᠠ᠈ ᡝᡳᠴᡳ ᠪᡠᡵᡠ ᡝᡳᠴᡳ ᠪᠠᡵᠠ᠉ ᠪᡠᡵᡠ ᡩᠠᡩᡝ ᠪᠠᡵᠠ ᠰᡝᡵᡝᠩᡤᡝ᠈
ᡨᡝᡵᡝᡳ ᡩᠣᠯᠣ ᠠᡵᡥᡠᠨ ᠪᡳ᠉ ᠪᠠᡵᠠ ᡩᠠᡩᡝ ᠪᡠᡵᠨ ᠰᡝᡵᡝᠩᡤᡝ᠈ ᡨᡝᡵᡝᡳ ᡩᠣᠯᠣ ᠵᠠᡴᠠ ᠪᡳ᠉
ᡤᡝᡵᡳ ᡩᠠᡩᡝ ᡶᠠᡵᡳ ᠰᡝᡵᡝᠩᡤᡝ᠈ ᡨᡝᡵᡝᡳ ᡩᠣᠯᠣ ᠨᠠᡵᡥᡡᠨ ᠪᡳ᠉
ᡨᡝᡵᡝᡳ ᠨᠠᡵᡥᡡᠨ ᡠᠮᡝᠰᡳ ᠶᠠᡵᡤᡳᠶᠠᠨ᠈ ᡨᡝᡵᡝᡳ ᡩᠣᠯᠣ ᡨᡝᠮᡤᡝᡨᡠᠩᡤᡝ ᠪᡳ᠉
ᠵᡠᠯᡤᡝᠴᡳ ᡨᡝ ᡩᡝ ᡳᠰᡳᡨᠠᠯᠠ᠈ ᡨᡝᡵᡝᡳ ᡤᡝᠪᡠ ᠪᡠᡵᡠᠪᡠᡵᠠᡴᡡ᠉
ᡝᡵᡝᠨᡳ ᡤᡝᡵᡝᠨ ᠰᠠᡳᡴᠠᠨ ᠪᡝ ᠴᡳᠨᠴᡳᠯᠠᠮᠪᡳ᠉
ᠪᡳ ᡤᡝᡵᡝᠨ ᠰᠠᡳᡴᠠᠨ ᡳ ᡠᡨᡨᡠ ᠣᡥᠣᠩᡤᡝ ᠪᡝ ᠠᡳᡩᡝ ᠰᠠᠮᠪᡳᠨᡳ᠈ ᡝᡩᡝ ᠪᡳ᠉
ᡳᡴᡡᠴᡳ ᠶᠣᠩᡴᡳᠶᠠᠮᠪᡳ᠈ ᠮᡠᠰᡝᠴᡳ ᠰᡳᡩᠠᡵᠠᠮᠪᡳ᠈ ᠨᡠᡥᠠᠯᡳᠶᠠᠨ ᠣᠴᡳ ᠵᠠᠯᡠᠮᠪᡳ᠈
ᠮᠠᠨᠠᠴᡳ ᡳᠴᡝᠮᠯᡝᠮᠪᡳ᠈ ᡴᠣᠮᠰᠣ ᠣᠴᡳ ᠪᠠᡥᠠᠮᠪᡳ᠈ ᠯᠠᠪᡩᡠ ᠣᠴᡳ ᡥᡡᠯᡳᠮᠪᡠᠮᠪᡳ᠉
ᡠᡨᡨᡠ ᠣᡶᡳ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᡝᠮᡠ ᠪᡝ ᡨᡠᠸᠠᡴᡳᠶᠠᡶᡳ᠈ ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᡩᡠᡵᡠᠨ ᠣᠪᡠᡥᠠᠪᡳ᠉
ᠪᡝᠶᡝ ᠰᠠᠪᡠᡵᠠᡴᡡ ᠣᡶᡳ᠈ ᡨᡠᡨᡨᡠ ᡤᡝᠩᡤᡳᠶᡝᠨ ᠣᠮᠪᡳ᠉ ᠪᡝᠶᡝ ᡠᡵᡠᡧᡝᡵᠠᡴᡡ ᠣᡶᡳ᠈ ᡨᡠᡨᡨᡠ ᡳᠯᡝᡨᡠ ᠣᠮᠪᡳ᠉
ᠪᡝᠶᡝ ᡤᡝᠣᡤᡝᡩᡝᡵᠠᡴᡡ ᠣᡶᡳ᠈ ᡨᡠᡨᡨᡠ ᡤᡠᠩᡤᡝ ᠪᡳ᠉ ᠪᡝᠶᡝ ᡨᡠᡴᡳᠶᡝᠴᡝᡵᠠᡴᡡ ᠣᡶᡳ᠈ ᡨᡠᡨᡨᡠ ᡶᡠᠯᡠ ᠣᠮᠪᡳ᠉
ᡨᡝᡵᡝ ᡩᠠᠮᡠ ᡨᡝᠮᠰᡝᡵᠠᡴᡡ ᠣᡶᡳ᠈ ᡨᡠᡨᡨᡠ ᠠᠪᡴᠠᡳ ᡶᡝᠵᡝᡵᡤᡳᠩᡤᡝ ᡳᠨᡳ ᠪᠠᡵᡠ ᡨᡝᠮᠰᡝᠮᡝ ᠮᡠᡨᡝᡵᡝᠩᡤᡝ ᠠᡴᡡ᠉
ᠵᡠᠯᡤᡝᡳ ᡥᡝᠨᡩᡠᡥᡝ ᡳᡴᡡᠴᡳ ᠶᠣᠩᡴᡳᠶᠠᠮᠪᡳ ᠰᡝᡥᡝᠩᡤᡝ᠈ ᠠᡳᠨᠠᡥᠠᡳ ᡨᠠᡧᠠᠨ ᡤᡳᠰᡠᠨ ᠨᡳ᠉
ᡠᠨᡝᠩᡤᡳ ᠣᠴᡳ ᠶᠣᠩᡴᡳᠶᠠᡶᡳ ᠪᡝᡩᡝᡵᡝᠮᠪᡳ᠉
ᠠᠰᡠᡵᡠ ᡤᡳᠰᡠᡵᡝᡵᠠᡴᡡᠩᡤᡝ ᡝᠴᡳ ᡠᡨᡨᡠ᠉ ᡧᡝᠣ ᠰᡝᡵᡝ ᡝᡩᡠᠨ ᡧᡠᠨ ᡨᡠᡥᡝᠨᡨᡝᠯᡝ ᡩᠠᡵᠠᡴᡡ᠉
ᡥᡠᡴᠰᡳᡩᡝᡵᡝ ᠠᡤᠠ ᡧᡠᠨᡨᡠᡥᡠᠨᡳ ᠠᡤᠠᡵᠠᡴᡡ᠉ ᠸᡝ ᡝᡵᡝᠪᡝ ᠶᠠᠪᡠᡵᡝᠩᡤᡝ᠉
ᠠᠪᡴᠠ ᠨᠠ᠉ ᠠᠪᡴᠠ ᠨᠠ ᡥᠣᠨᠣ ᡤᠣᡳᡩᠠᠮᡝ ᠮᡠᡨᡝᡵᠠᡴᡡ ᠪᠠᡩᡝ᠈
ᠨᡳᠶᠠᠯᠮᠠ ᠪᡝ ᠠᡳ ᡥᡝᠨᡩᡠᡵᡝ᠉ ᡨᡠᡨᡨᡠ ᠣᡶᡳ ᡩᠣᡵᠣ ᡩᡝ ᡴᡳᠴᡝᡵᡝ ᡠᡵᠰᡝ᠈
ᡩᠣᡵᠣ ᠣᠵᠣᡵᠣᠩᡤᡝ ᡩᠣᡵᠣ ᡩᡝ ᡠᡥᡝᠯᡝᠮᠪᡳ᠉ ᡝᡵᡩᡝᠮᡠ ᠣᠵᠣᡵᠣᠩᡤᡝ ᡩᡝ ᡝᡵᡩᡝᠮᡠ ᡠᡥᡝᠯᡝᠮᠪᡳ᠉
ᡠᡶᠠᡵᠠᠴᡠᠨ ᠣᠵᠣᡵᠣᠩᡤᡝ ᡠᡶᠠᡵᠠᠴᡠᠨ ᡩᡝ ᡠᡥᡝᠯᡝᠮᠪᡳ᠉
ᡩᠣᡵᠣ ᡩᡝ ᡠᡥᡝᠯᡝᡵᡝᠩᡤᡝ ᡩᠣᡵᠣ ᡳᠨᡠ ᠰᡝᠪᠵᡝᠯᡝᠮᡝ ᠪᠠᡥᠠᠮᠪᡳ᠉
ᡝᡵᡩᡝᠮᡠ ᡩᡝ ᡠᡥᡝᠯᡝᡵᡝᠩᡤᡝ ᡝᡵᡩᡝᠮᡠ ᡳᠨᡠ ᠰᡝᠪᠵᡝᠯᡝᠮᡝ ᠪᠠᡥᠠᠮᠪᡳ᠉
ᡠᡶᠠᡵᠠᠴᡠᠨ ᡩᡝ ᡠᡥᡝᠯᡝᡵᡝᠩᡤᡝ ᡠᡶᠠᡵᠠᠴᡠᠨ ᡳᠨᡠ ᠰᡝᠪᠵᡝᠯᡝᠮᡝ ᠪᠠᡥᠠᠮᠪᡳ᠉
ᠠᡴᡩᡠᠨ ᡨᡝᠰᡠᡵᠠᡴᡡ ᠣᠴᡳ᠈ ᠠᡴᡩᠠᡵᠠᡴᡡᠩᡤᡝ ᠪᡳ᠉
ᠪᡝᡨᡥᡝ ᠨᡝᠩᡤᡝᡵᡝᠩᡤᡝ ᡳᠯᡳᡵᠠᡴᡡ᠉ ᠣᡴᠰᠣᠨ ᡤᠠᡵᡩᠠᡧᠠᡵᠠᠩᡤᡝ ᠶᠠᠪᡠᡵᠠᡴᡡ᠉
ᠪᡝᠶᡝ ᠰᠠᠪᡠᡵᡝᠩᡤᡝ ᡤᡝᠩᡤᡳᠶᡝᠨ ᠠᡴᡡ᠉ ᠪᡝᠶᡝ ᡠᡵᡠᡧᡝᡵᡝᠩᡤᡝ ᡳᠯᡝᡨᡠ ᠠᡴᡡ᠉
ᠪᡝᠶᡝ ᡤᡝᠣᡤᡝᡩᡝᡵᡝᠩᡤᡝ ᡤᡠᠩᡤᡝ ᠠᡴᡡ᠉ ᠪᡝᠶᡝ ᡨᡠᡴᡳᠶᡝᠴᡝᡵᡝᠩᡤᡝ ᡶᡠᠯᡠ ᠠᡴᡡ᠉
ᡨᡝᡵᡝ ᡩᠣᡵᠣ ᡩᡝ ᠣᠴᡳ ᡶᡠᠨᠴᡝᡨᡝᠯᡝ ᠵᡝᠮᡝᠩᡤᡝ ᡶᡠᠯᡠ ᠠᡵᠪᡠᠨ ᠰᡝᠮᠪᡳ᠉
ᠨᡳᠶᠠᠯᠮᠠ ᡝᠮᠪᡳᠴᡳ ᡝᡳᠮᡝᡩᡝ᠈ ᡨᡠᡨᡨᡠ ᡩᠣᡵᠣ ᠪᡳᠰᡳᡵᡝ ᡠᡵᠰᡝ ᠪᡳᠰᡳᡵᠠᡴᡡ᠉
ᠵᠠᡴᠠ ᠪᡳᡶᡳ ᡤᡝᠯᡥᡠᠨ ᡳ ᠮᡠᡨᡝᠪᡠᡵᡝ᠈ ᠠᠪᡴᠠ ᠨᠠ ᡳ ᠨᡝᠨᡩᡝᠨ ᠴᡳ ᠪᠠᠨᠵᡳᠮᠪᡳ᠉
ᠴᡳᠪ ᠰᡝᡵᡝ ᠰᡝᡵ ᠰᡝᡵᡝ᠈ ᡝᠮᡥᡠᠨ ᡳᠯᡳᡶᡳ ᡥᠠᠯᠠᡵᠠᡴᡡ᠉ ᡧᡠᡵᡩᡝᠮᡝ ᠶᠠᠪᡠᡶᡳ ᡨᡠᡴᠰᡳᠴᡠᡴᡝ ᠠᡴᡡ᠉
ᠠᠪᡴᠠᡳ ᡶᡝᠵᡝᡵᡤᡳ ᡳ ᡝᠮᡝ ᠣᠴᡳ ᠣᠮᠪᡳ᠉ ᠪᡳ ᡨᡝᡵᡝᡳ ᡤᡝᠪᡠ ᠪᡝ ᠰᠠᡵᡴᡡ᠉
ᡩᠣᡵᠣ ᠰᡝᠮᡝ ᡥᡡᠯᠠᠮᠪᡳ᠉ ᡥᠠᠴᡳᡥᡳᠶᠠᠮᡝ ᡤᡝᠪᡠᠯᡝᡵᡝ ᠪᡝ ᠠᠮᠪᠠ ᠰᡝᠮᠪᡳ᠉
ᠠᠮᠪᠠ ᠪᡝ ᡤᡝᠨᡝᠮᠪᡳ ᠰᡝᠮᠪᡳ᠉ ᡤᡝᠨᡝᡵᡝ ᠪᡝ ᡤᠣᡵᠣ ᠰᡝᠮᠪᡳ᠉ ᡤᠣᡵᠣ ᠪᡝ ᠠᠮᠠᠰᡳ ᠰᡝᠮᠪᡳ᠉
ᡨᡠᡨᡨᡠ ᠣᡶᡳ ᡩᠣᡵᠣ ᠠᠮᠪᠠ ᠠᠪᡴᠠ ᠠᠮᠪᠠ᠉ ᠨᠠ ᠠᠮᠪᠠ ᡥᠠᠨ ᡳᠨᡠ ᠠᠮᠪᠠ᠉
ᠵᠠᠯᠠᠨ ᡩᡝ ᡩᡠᡳᠨ ᠠᠮᠪᠠ ᠪᡳᡶᡳ᠈ ᡥᠠᠨ ᡨᡝᡵᡝ ᡝᠮᡠ ᡩᡝ ᠪᡳᠮᠪᡳ᠉
ᠨᡳᠶᠠᠯᠮᠠ ᠨᠠ ᠪᡝ ᠠᠯᡥᡡᡩᠠᠮᠪᡳ᠉ ᠨᠠ ᠠᠪᡴᠠ ᠪᡝ ᠠᠯᡥᡡᡩᠠᠮᠪᡳ᠉
ᠠᠪᡴᠠ ᡩᠣᡵᠣ ᠪᡝ ᠠᠯᡥᡡᡩᠠᠮᠪᡳ᠉ ᡩᠣᡵᠣ ᡳᠨᡳ ᠴᡳᠰᡠᡳ ᠪᡝ ᠠᠯᡥᡡᡩᠠᠮᠪᡳ᠉
ᡠᠵᡝᠨ ᠪᡝ ᠸᡝᡳᡥᡠᡴᡝᠨ ᡳ ᡩᠠ ᠣᠪᡠᠮᠪᡳ᠉ ᠴᡳᠪᠰᡝᠨ ᠪᡝ ᡩᠠᠪᡩᡠᡵᡳ ᡳ ᡝᠵᡝᠨ ᠣᠪᡠᠮᠪᡳ᠉
ᡠᡨᡨᡠ ᠣᡶᡳ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᡝᠮᡠ ᡳᠨᡝᠩᡤᡳ ᠵᡠᡵᠠᠴᡳᠪᡝ ᠠᠴᡳᡥᠠ ᠰᡝᠵᡝᠨ ᠪᡝ ᠸᠠᠯᡳᠶᠠᡵᠠᡴᡡ᠉
ᡠᡩᡠ ᠰᠠᡳᡴᠠᠨ ᡨᡠᠸᠠᠪᡠᠨ ᠪᡳᡴᡝ ᠰᡝᠮᡝ᠈ ᠯᡝᡵ ᠰᡝᠮᡝ ᡝᠯᡝᡥᡠᠨ ᡳ ᡧᠣᠯᠣ ᡨᡝᡥᡝ ᠠᡩᠠᠯᡳ ᠪᡳᡥᡝᠪᡳ᠉
ᠠᡳᠨᡠ ᡨᡠᠮᡝᠨ ᠰᡝᠵᡝᠩᡤᡝ ᡳ ᡝᠵᡝᠨ ᠪᡳᠮᡝ᠈ ᠪᡝᠶᡝᠪᡝ ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᠸᡝᡳᡥᡠᡴᡝᠯᡝᠮᠪᡳ ᠨᡳ᠉
ᠸᡝᡳᡥᡠᡴᡝᠨ ᠣᠴᡳ ᡩᠠ ᠪᡝ ᡠᡶᠠᡵᠠᠪᡠᠮᠪᡳ᠉ ᡩᠠᠪᡩᡠᡵᡳ ᠣᠴᡳ ᡝᠵᡝᠨ ᠪᡝ ᡠᡶᠠᡵᠠᠪᡠᠮᠪᡳ᠉
ᠶᠠᠪᡠᠮᡝ ᠪᠠᡥᠠᠨᠠᡵᠠᠩᡤᡝ ᠶᡠᠨ ᠰᠣᠩᡴᠣ ᠠᡴᡡ᠉ ᡤᡳᠰᡠᡵᡝᠮᡝ ᠪᠠᡥᠠᠨᠠᡵᠠᠩᡤᡝ ᡳᠴᡳᡥᡳ ᡶᡳᠶᠠᡵᡨᡠᠨ ᠠᡴᡡ᠉
ᠪᠣᡩᠣᠮᡝ ᠪᠠᡥᠠᠨᠠᡵᠠᠩᡤᡝ ᡧᡝᡵᡨᡠ ᠪᠣᡩᠣᡴᡡ ᠪᡝ ᠪᠠᡳᠪᡠᡵᠠᡴᡡ᠉
ᠶᠠᡴᠰᡳᠮᡝ ᠪᠠᡥᠠᠨᠠᡵᠠᠩᡤᡝ ᠰᠣᠩᡤᡳᡥᠠ ᠶᠠᡴᠰᡳᡴᡡ ᠠᡴᡡ ᠪᡳᠮᡝ ᠨᡝᡳᠴᡳ ᠣᠵᠣᡵᠠᡴᡡ᠉
ᡥᡡᠸᠠᡳᡨᠠᠮᡝ ᠪᠠᡥᠠᠨᠠᡵᠠᠩᡤᡝ ᡶᡠᡨᠠ ᡳ ᠮᠠᠮᡦᡳᡵᠠᡴᡡ ᠪᡳᠮᡝ᠈ ᠰᡠᠴᡳ ᠣᠵᠣᡵᠠᡴᡡ᠉
ᡠᡨᡨᡠ ᠣᡶᡳ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᡴᡝᠮᡠᠨᡳ ᠨᡳᠶᠠᠯᠮᠠ ᠪᡝ ᠠᡳᡨᡠᠪᡠᠮᡝ ᠪᠠᡥᠠᠨᠠᠮᡝ ᠣᡶᡳ᠈
ᡨᡠᡨᡨᡠ ᠸᠠᠯᡳᠶᠠᡥᠠ ᠨᡳᠶᠠᠯᠮᠠ ᠠᡴᡡ᠉ ᡴᡝᠮᡠᠨᡳ ᠵᠠᡴᠠ ᠪᡝ ᠠᡳᡨᡠᠪᡠᠮᡝ ᠪᠠᡥᠠᠨᠠᠮᡝ ᠣᡶᡳ᠈
ᡨᡠᡨᡨᡠ ᠸᠠᠯᡳᠶᠠᡥᠠ ᠵᠠᡴᠠ ᠠᡴᡡ᠉ ᡝᡵᡝᠪᡝ ᡤᡝᠩᡤᡳᠶᡝᠨ ᠪᡝ ᠰᡳᡵᠠᠮᠪᡳ ᠰᡝᠮᠪᡳ᠉
ᡨᡠᡨᡨᡠ ᠣᡶᡳ ᠰᠠᡳᠨ ᠨᡳᠶᠠᠯᠮᠠ ᠰᡝᡵᡝᠩᡤᡝ ᠰᠠᡳᠨ ᠠᡴᡡ ᠨᡳᠶᠠᠯᠮᠠᡳ ᠰᡝᡶᡠ᠈
ᠰᠠᡳᠨ ᠠᡴᡡ ᠨᡳᠶᠠᠯᠮᠠ ᠰᡝᡵᡝᠩᡤᡝ ᠰᠠᡳᠨ ᠨᡳᠶᠠᠯᠮᠠᡳ ᠰᠠᠯᡤᠠᠪᡠᠨ᠉
ᡨᡝᡵᡝᡳ ᠰᡝᡶᡠ ᠪᡝ ᠸᡝᠰᡳᡥᡠᠯᡝᡵᠠᡴᡡ᠈ ᡨᡝᡵᡝᡳ ᠰᠠᠯᡤᠠᠪᡠᠨ ᠪᡝ ᡥᠠᡳᡵᠠᡵᠠᡴᡡ᠈ ᡠᡩᡠ ᠰᠠᠴᡳᠪᡝ ᠠᠮᠪᠠ ᡶᠠᠮᠪᡠᡵᡝ ᠠᡩᠠᠯᡳ᠉ ᡝᡵᡝᠪᡝ ᠣᠶᠣᠩᡤᠣ ᡶᡝᡵᡤᡠᠸᡝᠴᡠᡴᡝ ᠣᠪᡠᠮᠪᡳ᠉
ᡨᡝᡵᡝᡳ ᠠᠮᡳᠯᠠ ᠪᡝ ᠰᠠᡶᡳ᠈ ᡨᡝᡵᡝᡳ ᡝᠮᡳᠯᡝ ᠪᡝ ᡨᡠᠸᠠᡴᡳᠶᠠᠮᡝ᠈ ᠠᠪᡴᠠᡳ ᡶᡝᠵᡝᡵᡤᡳ ᡳ ᠶᠣᡥᠣᠨ ᠣᠮᠪᡳ᠉
ᠠᠪᡴᠠᡳ ᡶᡝᠵᡝᡵᡤᡳ ᡳ ᠶᠣᡥᠣᠨ ᠣᠴᡳ᠈ ᡝᠨᡨᡝᡥᡝᠮᡝ ᡝᡵᡩᡝᠮᡠ ᠠᠯᠵᠠᡵᠠᡴᡡ ᠣᡶᡳ᠈ ᡥᡠᡥᡠᡵᡳ ᠵᡠᡳ ᡩᠠᡥᡡᠮᡝ ᠪᡝᡩᡝᡵᡝᠮᠪᡳ᠉
ᡨᡝᡵᡝᡳ ᡧᠠᠨᠶᠠᠨ ᠪᡝ ᠰᠠᡶᡳ ᡨᡝᡵᡝᡳ ᠰᠠᡥᠠᠯᡳᠶᠠᠨ ᠪᡝ ᡨᡠᠸᠠᡴᡳᠶᠠᠮᡝ᠈ ᠠᠪᡴᠠᡳ ᡶᡝᠵᡝᡵᡤᡳ ᡳ ᡩᡠᡵᡠᠨ ᠣᠮᠪᡳ᠉
ᠠᠪᡴᠠᡳ ᡶᡝᠵᡝᡵᡤᡳ ᡳ ᡩᡠᡵᡠᠨ ᠣᠴᡳ᠈ ᡝᠨᡨᡝᡥᡝᠮᡝ ᡝᡵᡩᡝᠮᡠ ᠵᡠᡵᠴᡝᡵᠠᡴᡡ ᠣᡶᡳ᠈ ᠠᡴᡡᡳ ᡨᡝᠨ ᡩᡝ ᡩᠠᡥᡡᠮᡝ ᠪᡝᡩᡝᡵᡝᠮᠪᡳ᠉
ᡨᡝᡵᡝᡳ ᡩᡝᡵᡝᠩᡤᡝ ᠪᡝ ᠰᠠᡶᡳ ᡨᡝᡵᡝᡳ ᡤᡳᡵᡠᠴᡠᠨ ᠪᡝ ᡨᡠᠸᠠᡴᡳᠶᠠᠮᡝ᠈ ᠠᠪᡴᠠᡳ ᡶᡝᠵᡝᡵᡤᡳ ᡳ ᡥᠣᠯᠣ ᠣᠮᠪᡳ᠉
ᠠᠪᡴᠠᡳ ᡶᡝᠵᡝᡵᡤᡳ ᡳ ᡥᠣᠯᠣ ᠣᠴᡳ᠈ ᡝᠨᡨᡝᡥᡝᠮᡝ ᡝᡵᡩᡝᠮᡠ ᡨᡝᠨᡳ ᡨᡝᠰᡠᠮᡝ ᠣᡶᡳ᠈ ᡤᡝᠯᡥᡠᠨ ᡩᡝ ᡩᠠᡥᡡᠮᡝ ᠪᡝᡩᡝᡵᡝᠮᠪᡳ᠈
ᡤᡠᠯᡥᡠᠨ ᠰᠠᠮᠰᡳᠴᡳ ᡨᡝᡨᡠᠨ ᠣᠮᠪᡳ᠉ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᠪᠠᡳᡨᠠᠯᠠᠪᠠ ᡩᡝ ᡥᠠᡶᠠᠨ ᡩᠠᡨᠠ ᠣᠮᠪᡳ᠉
ᡨᡠᡨᡨᡠ ᠣᡶᡳ ᡠᠯᡥᠠ ᠸᠠᡵᠠ ᡠᡵᠰᡝ ᡶᠠᡳᡨᠠᡵᠠ ᡩᡝ ᡴᡳᠴᡝᡵᠠᡴᡡ᠉
ᠠᠪᡴᠠᡳ ᡶᡝᠵᡝᡵᡤᡳ ᠪᡝ ᡤᠠᠮᠠᡶᡳ ᡩᡝᡵᡳᠪᡠᡴᡳ ᠰᡝᡵᡝᡩᡝ᠈ ᠪᡳ ᡨᡝᡵᡝᡳ ᡠᠮᠠᡳᠨᠠᠴᡳ ᠣᠵᠣᡵᠠᡴᡡ ᠪᡝ ᠰᠠᠪᡠᠮᠪᡳ᠉
ᠠᠪᡴᠠᡳ ᡶᡝᠵᡝᡵᡤᡳ ᠰᡝᡵᡝᠩᡤᡝ᠈ ᡝᠨᡩᡠᡵᡳ ᡨᡝᡨᡠᠨ ᡳᠨᡠ᠈ ᡩᡝᡵᡳᠪᡠᠴᡳ ᠣᠵᠣᡵᠠᡴᡡ ᡴᠠᡳ᠉
ᡩᡝᡵᡳᠪᡠᡵᡝᠩᡤᡝ ᠵᠣᠴᡳᠪᡠᠮᠪᡳ᠉ ᠵᠠᡶᠠᡵᠠᠩᡤᡝ ᡠᡶᠠᡵᠠᠮᠪᡳ᠈ ᡨᡠᡨᡨᡠ ᠶᠠᠶᠠ ᠵᠠᡴᠠ ᡩᡝ ᡝᠮᡝᠮᡠ ᠶᠠᠪᡠᠮᠪᡳ
ᡝᠮᡝᠮᡠ ᡩᠠᡥᠠᠮᠪᡳ᠈ ᡝᠮᡝᠮᡠ ᠰᡠᠩᡴᡝᠮᠪᡳ ᡝᠮᡝᠮᡠ ᡶᡠᠯᡤᡳᠶᡝᠮᠪᡳ᠈
ᡝᠮᡝᠮᡠ ᡝᡨᡠᡥᡠᠨ ᡝᠮᡝᠮᡠ ᠶᠠᡩᠠᠯᡳᠩᡤᡡ᠈ ᡝᠮᡝᠮᡠ ᡨᡝᠪᡠᠮᠪᡳ ᡝᠮᡝᠮᡠ ᡨᡠᡥᡝᠮᠪᡳ᠈
ᡠᡨᡨᡠ ᠣᡶᡳ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᡩᠠᠪᠠᠯᡳ ᠪᡝ ᠠᠰᡥᡡᠮᠪᡳ᠈
ᠮᠠᠮᡤᡳᠶᠠᡴᡡ ᠪᡝ ᠠᠰᡥᡡᠮᠪᡳ᠈ ᠴᠣᡴᡨᠣ ᠪᡝ ᠠᠰᡥᡡᠮᠪᡳ᠉
ᡩᠣᡵᠣᡳ ᡝᠵᡝᠨ ᠣᡥᠣ ᠨᡳᠶᠠᠯᠮᠠ ᡩᡝ ᠠᡳᠰᡳᠯᠠᡵᠠᠩᡤᡝ ᠴᠣᠣᡥᠠ ᡳ ᠠᠪᡴᠠᡳ ᡶᡝᠵᡝᡵᡤᡳ ᠪᡝ ᡝᡨᡝᠩᡤᡳᠯᡝᡵᠠᡴᡡ᠉
ᡠᡵᡠᡳ ᡶᠣᡵᡤᠣᡧᠣᡵᠣ ᡩᡝ ᠠᠮᡠᡵᠠᠨ ᠪᡝ ᡴᡳᠴᡝᠮᠪᡳ᠉ ᠴᠣᠣᡥᠠ ᡳ ᡳᠯᡳᡥᠠ ᠪᠠᡩᡝ ᠪᡠᠯᠠ ᠵᠠᠵᡳᠨ ᠪᠠᠨᠵᡳᠮᠪᡳ᠉
ᠠᠮᠪᠠᡵᠠᠮᡝ ᠴᠣᠣᡥᠠᠯᠠᠪᠠ ᠠᠮᠠᠯᠠ᠈ ᡠᡵᡠᠨᠠᡴᡡ ᡥᠠᠵᡳ ᠠᠨᡳᠶᠠ ᠪᡳ᠉ ᠰᠠᡳᠨ ᡠᡵᠰᡝ ᡴᡝᠩᠰᡝ ᡩᡝ ᠸᠠᠵᡳᡥᠠ᠈
ᡤᡝᠯᡥᡠᠨ ᠠᡴᡡ ᡝᡨᡝᠩᡤᡳ ᠪᡝ ᡤᠠᡳᡵᠠᡴᡡ᠉ ᡴᡝᠩᠰᡝ ᠣᡶᡳ ᡨᡠᡴᡳᠶᡝᠴᡝᡵᠠᡴᡡ᠉ ᡴᡝᠩᠰᡝ ᠣᡶᡳ ᡤᡝᠣᡤᡝᡩᡝᡵᠠᡴᡡ᠉
ᡴᡝᠩᠰᡝ ᠣᡶᡳ ᠴᠣᡴᡨᠣᠯᠣᡵᠠᡴᡡ᠉ ᡴᡝᠩᠰᡝ ᠣᡶᡳ ᡠᠮᠠᡳᠨᠠᠴᡳ ᠣᠵᠣᡵᠠᡴᡡᠩᡤᡝ᠈ ᡝᡵᡝ ᡴᡝᠩᠰᡝ ᠣᡶᡳ ᡝᡨᡝᠩᡤᡳ ᠠᡴᡡᠩᡤᡝ ᡳᠨᡠ᠉
ᠵᠠᡴᠠ ᠮᠠᠨᡩᡠᠴᡳ ᠰᠠᡴᡩᠠ ᠣᠮᠪᡳ᠉ ᡝᡵᡝᠪᡝ ᡩᠣᡵᠣ ᠠᡴᡡ ᠰᡝᠮᠪᡳ᠈ ᡩᠣᡵᠣ ᠠᡴᡡ ᠪᡝ ᡝᡵᡩᡝᡴᡝᠨ ᡳ ᠨᠠᡴᠠ᠉
ᡨᡝᡵᡝ ᡩᠠᠴᡠᠨ ᠴᠣᠣᡥᠠ ᠰᡝᡵᡝᠩᡤᡝ ᠰᠠᡳᠨ ᠠᡴᡡ ᡳ ᡨᡝᡨᡠᠨ᠉ ᠨᡳᠶᠠᠯᠮᠠ ᡝᠮᠪᡳᠴᡳ ᡠᠪᡳᠶᠠᠮᠪᡳ᠉
ᡨᡠᡨᡨᡠ ᠣᡶᡳ ᡩᠣᡵᠣ ᠪᡳᠰᡳᡵᡝ ᡠᡵᠰᡝ ᡤᠠᠮᠠᡵᠠᡴᡡ᠉ ᠠᠮᠪᠠᠰᠠ ᠰᠠᡳᠰᠠ ᡨᡝᡥᡝᡩᡝ ᡥᠠᠰᡥᡡ ᠪᡝ ᠸᡝᠰᡳᡥᡠᠯᡝᠮᠪᡳ᠉
ᠴᠣᠣᡥᠠ ᠪᠠᡳᡨᠠᠯᠠᠴᡳ ᡳᠴᡳ ᠪᡝ ᠸᡝᠰᡳᡥᡠᠯᡝᠮᠪᡳ᠉ ᠴᠣᠣᠪᠠ ᠰᡝᡵᡝᠩᡤᡝ ᠰᠠᡳᠨ ᠠᡴᡡ ᡳ ᡨᡝᡨᡠᠨ᠈
ᠠᠮᠪᠠᠰᠠ ᠰᠠᡳᠰᠠ ᡳ ᡨᡝᡨᡠᠨ ᠸᠠᡴᠠ᠉ ᡠᠮᠠᡳᠨᠠᠴᡳ ᠣᠵᠣᡵᠠᡴᡡ ᠣᡶᡳ ᠪᠠᡳᡨᠠᠯᠠᠮᠪᡳ᠉
ᠪᠣᠯᡤᠣ ᡥᡳᠴᠠᠨ ᠪᡝ ᠸᡝᠰᡳᡥᡠᠨ ᠣᠪᡠᠮᡝ᠈ ᡝᡨᡝᠴᡳᠪᡝ ᠰᠠᡳᠨ ᠣᠪᡠᡵᠠᡴᡡ᠉
ᠠᡳᡴᠠ ᠰᠠᡳᠨ ᠣᠪᡠᡵᡝᠩᡤᡝ ᠨᡳᠶᠠᠯᠮᠠ ᠪᡝ ᠸᠠᡵᠠ ᡩᡝ ᠰᡝᠪᠵᡝᠯᡝᡵᡝᠩᡤᡝ ᡳᠨᡠ᠉
ᡨᡝᡵᡝ ᠨᡳᠶᠠᠯᠮᠠ ᠪᡝ ᠸᠠᡵᠠ ᡩᡝ ᠰᡝᠪᠵᡝᠯᡝᡵᡝᠩᡤᡝ᠈ ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᠮᡠᠵᡳᠨ ᠪᠠᡥᠠᠴᡳ ᠣᠵᠣᡵᠠᡴᡡ᠉
ᡠᡵᡤᡠᠨ ᡳᡳᡳ ᠪᠠᡳᡨᠠ ᡩᡝ ᡥᠠᠰᡥᡡ ᠪᡝ ᠸᡝᠰᡳᡥᡠᠯᡝᠮᠪᡳ᠉ ᠰᡳᠨᠠᡤᠠᠨ ᡳ ᠪᠠᡳᡨᠠ ᡩᡝ ᡳᠴᡳ ᠪᡝ ᠸᡝᠰᡳᡥᡠᠯᡝᠮᠪᡳ᠉
ᠠᡩᠠᡥᠠ ᠵᡳᠶᠠᠩᡤᡳᠶᡡᠨ ᡥᠠᠰᡥᡡ ᡩᡝ ᠪᡳᠮᠪᡳ᠉ ᡩᡝᡵᡤᡳ ᠵᡳᠶᠠᠩᡤᡳᠶᡡᠨ ᡳᠴᡳ ᡩᡝ ᠪᡳᠮᠪᡳ᠉
ᡨᡝᠪᡠᡥᡝ ᠪᡝ ᡨᠣᡴᡨᠣᠪᡠᡵᡝ ᡩᡝ ᠰᡳᠨᠠᡤᠠᠨ ᡳ ᡩᠣᡵᠣᡳ ᡤᠠᠮᠠᡵᠠ ᠪᡝ ᡤᡳᠰᡠᡵᡝᡥᡝᠪᡳ᠉ ᠸᠠᡥᠠ ᠨᡳᠶᠠᠯᠮᠠ ᠯᠠᠪᡩᡠ ᡤᡝᡵᡝᠨ᠈ ᠠᡴᠠᠮᡝ ᡠᡵᡝᡵᡝ ᠪᡝ ᠰᠣᠩᡤᠣᠮᠪᡳ᠉ ᠠᡶᠠᡶᡳ ᡝᡨᡝᠴᡳ᠈ ᠰᡳᠨᠠᡤᠠᠨ ᡳ ᡩᠣᡵᠣᡳ ᡤᠠᠮᠠᠮᠪᡳ᠉
ᡩᠣᡵᠣ ᡩᡝ ᡝᠨᡨᡝᡥᡝᠮᡝ ᡤᡝᠪᡠ ᠠᡴᡡ᠉ ᡤᡠᠯᡠ ᡠᡩᡠ ᠠᠵᡳᡤᡝ ᠰᡝᠮᡝ᠈
ᠠᠪᡴᠠᡳ ᡶᡝᠵᡝᡵᡤᡳᠩᡤᡝ ᡤᡝᠯᡥᡠᠨ ᠠᡴᡡ ᠠᠮᠪᠠᠨ ᠣᠪᡠᡵᠠᡴᡡ᠉
ᡥᡝᠣ ᠸᠠᠩ ᠠᡳᡴᠠ ᡨᡠᠸᠠᡴᡳᠶᠠᠮᡝ ᠮᡠᡨᡝᠴᡳ᠈ ᡨᡠᠮᡝᠨ ᠵᠠᡴᠠ ᠪᡝᠶᡝ ᡩᠠᡥᠠᠨᠵᡳᡴᡳ ᠰᡝᠮᠪᡳ᠈
ᠠᠪᡴᠠ ᠨᠠ ᡳᠰᡥᡠᠨᡩᡝ ᠠᠴᠠᡶᡳ᠈ ᠵᠠᠨᠴᡠᡥᡡᠨ ᠰᡳᠯᡝᠩᡤᡳ ᠪᡝ ᠸᠠᠰᡳᠮᠪᡠᠮᡝ᠈
ᠨᡳᠶᠠᠯᠮᠠ ᡶᠠᡶᡠᠯᠠᡵᠠ ᠪᡝ ᠪᠠᡳᠪᡠᡵᠠᡴᡡ ᠪᡳᠮᡝ ᠪᡝᠶᡝ ᠨᡝᡳᡤᡝᠨ ᠣᠮᠪᡳ᠉
ᡩᡝᡵᡳᠪᡠᠮᡝ ᡤᡝᠪᡠ ᠪᡳᠰᡳᡵᡝ ᠪᡝ ᡨᠣᡴᡨᠣᠪᡠᠮᡝ᠈ ᡤᡝᠪᡠ ᡳᠨᡠ ᠪᡳᠴᡳ ᡨᡝᡨᡝᠨᡩᡝᡵᡝ᠈
ᡨᡝᡵᡝ ᡳᠨᡠ ᡳᠯᡳᠨ ᠪᡝ ᠰᠠᡴᡳ ᠰᡝᠮᠪᡳ᠉ ᡳᠯᡳᠨ ᠪᡝ ᠰᠠᡥᠠ ᡩᡝ ᡨᡠᡨᡨᡠ ᡨᡠᡴᠰᡳᠴᡠᡴᡝ ᠠᡴᡡ᠈
ᡩᡠᡳᠪᡠᠯᡝᠴᡳ ᡩᠣᡵᠣ ᡳ ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᠪᡳᠰᡳᡵᡝ ᠪᡝ᠈
ᡠᡨᡥᠠᡳ ᠪᡳᡵᠠ ᡥᠣᠯᠣ ᡳ ᡠᠯᠠ ᠮᡝᡩᡝᡵᡳ ᡩᡝ ᠪᡝᡩᡝᡵᡝᡵᡝ ᠠᡩᠠᠯᡳ᠉
ᠨᡳᠶᠠᠯᠮᠠ ᠪᡝ ᠰᠠᡵᠠᠩᡤᡝ ᠮᡝᡵᡤᡝᠨ᠈ ᠪᡝᠶᡝ ᠰᠠᡵᠠᠩᡤᡝ ᡤᡝᠩᡤᡳᠶᡝᠨ᠉
ᠨᡳᠶᠠᠯᠮᠠ ᠪᡝ ᡝᡨᡝᡵᡝᠩᡤᡝ ᡥᡡᠰᡠᠩᡤᡝ᠈ ᠪᡝᠶᡝ ᡝᡨᡝᡵᡝᠩᡤᡝ ᡝᡨᡝᠩᡤᡳ᠉
ᡝᠯᡝᠴᡠᠨ ᠪᡝ ᠰᠠᡵᠠᠩᡤᡝ ᠪᠠᠶᠠᠨ᠈ ᠶᠠᠪᡠᠨ ᠪᡝ ᡥᠠᠴᡳᡥᡳᠶᠠᡵᠠᠩᡤᡝ ᠮᡠᠵᡳᠩᡤᠠ᠉
ᡨᡝᡵᡝᡳ ᠪᠠᠪᡝ ᡠᡶᠠᡵᠠᡵᠠᡴᡡᡠᡤᡤᡝ ᡤᠣᠯᠮᡳᠨ᠈ ᠪᡠᠴᡝᡶᡳ ᡤᡠᡴᡠᡵᠠᡴᡡᠩᡤᡝ ᠵᠠᠯᠠᡶᡠᠨ᠉
ᠠᠮᠪᠠ ᡩᠣᡵᠣ ᡩᡝᠰᡝᡵᡝᡴᡝ ᡤᡝᠰᡝ᠉ ᡥᠠᠰᡥᡡ ᡳᠴᡳ ᠣᠴᡳᠪᡝ ᠣᠮᠪᡳ᠉
ᡨᡠᠮᡝᠨ ᠵᠠᡴᠠ ᠠᡴᡩᠠᡶᡳ ᠪᠠᠨᠵᡳᠮᠪᡳᠮᡝ ᠮᠠᡵᠠᡵᠠᡴᡡ᠉ ᡤᡠᠩᡤᡝ ᠮᡠᡨᡝᠪᡠᡶᡳ ᠪᡳᠰᡳᡵᡝ ᠪᡝ ᠰᡝᡵᠠᡴᡡ᠈
ᡨᡠᠮᡝᠨ ᠵᠠᡴᠠ ᠪᡝ ᡥᠠᡳᡵᠠᠮᡝ ᡠᠵᡳᠴᡳᠪᡝ ᡴᠠᡩᠠᠯᠠᠴᡳ ᠣᠪᡠᡵᠠᡴᡡ᠉
ᡝᠨᡨᡝᡥᡝᠮᡝ ᠪᡠᠶᡝᠨ ᠠᡴᡡ ᠣᡶᡳ ᠠᠵᡳᡤᡝ ᡩᡝ ᠰᡝᠴᡳ ᠣᠮᠪᡳ᠉
ᡨᡠᠮᡝᠨ ᠵᠠᡴᠠ ᡩᠠᠪᠠᠮᠪᡳᠮᡝ ᡴᠠᡩᠠᠯᠠᠴᡳ ᠪᡝ ᠰᠠᡵᡴᡡ ᠣᡶᡳ᠈ ᠠᠮᠪᠠ ᡩᡝ ᠰᡝᠴᡳ ᠣᠮᠪᡳ᠉
ᡠᡨᡨᡠ ᠣᡶᡳ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᠨᠠᡵᠠᠩᡤᡳ ᠠᠮᠪᠠ ᠣᠪᡠᡵᠠᡴᡡ ᠣᠵᠣᡵᠣ ᠵᠠᡴᠠᡩᡝ᠈
ᡨᡠᡨᡨᡠ ᡨᡝᡵᡝ ᠠᠮᠪᠠ ᠪᡝ ᠮᡠᡨᡝᠪᡠᠮᡝ ᠮᡠᡨᡝᡥᡝᠪᡳ᠉
ᠠᠮᠪᠠ ᠠᡵᠪᡠᠨ ᠪᡝ ᠵᠠᡶᠠᡶᡳ ᠠᠪᡴᠠᡳ ᡶᡝᠵᡝᡵᡤᡳ ᡩᡝ ᡤᡝᠨᡝᠴᡳ᠈ ᡤᡝᠨᡝᡶᡳ ᠵᠣᠪᠣᠪᡠᡵᠠᡴᡡ᠈
ᡝᠯᡥᡝ ᠰᡠᠯᡶᠠ ᡝᠯᡝᡥᡠᠨ ᠰᡝᠪᠵᡝᠨ ᠵᠠᡳ ᠠᠮᡨᠠᠩᡤᠠ ᠣᠴᡳ ᡩᡠᠯᡝᡵᡝ ᠠᠨᡨᠠᡥᠠ ᡳᠯᡳᠮᠪᡳ᠉
ᡩᠣᡵᠣ ᡳ ᠠᠩᡤᠠ ᠴᡳ ᡨᡠᠴᡳᡵᡝᠩᡤᡝ ᠨᡳᡨᠠᠨ ᠣᡶᡳ ᠠᠮᠪᠠᠨ ᠠᡴᡡ᠉
ᡨᡠᠸᠠᡵᠠ ᡩᡝ ᠰᠠᠪᡠᠴᡳ ᠣᠵᠣᡵᠣ ᠪᠠ ᠠᡴᡡ᠈ ᡩᠣᠨᠵᡳᡵᡝ ᡩᡝ ᡩᠣᠨᠵᡳᠴᡳ ᠣᠵᠣᡵᠣ ᠪᠠ ᠠᡴᡡ᠉
ᠪᠠᡳᡨᠠᠯᠠᡵᠠ ᡩᡝ ᠮᠣᡥᠣᠨ ᠣᠴᡳ ᠣᠵᠣᡵᠠᡴᡡ᠉
ᠪᠠᡵᡤᡳᠶᠠᡴᡳ ᠰᡝᡵᡝ ᠣᠩᡤᠣᠯᠣ᠈ ᡠᡵᡠᠨᠠᡴᡡ ᠨᡝᠨᡝᠮᡝ ᠰᠠᡵᠠᠮᠪᡳ᠉
ᠶᠠᡩᠠᠯᡳᠩᡤᡡ ᠣᡴᡳ ᠰᡝᡵᡝ ᠣᠩᡤᠣᠯᠣ᠈ ᡠᡵᡠᠨᠠᡴᡡ ᠨᡝᠨᡝᠮᡝ ᡝᡨᡠᡥᡠᡧᡝᠮᠪᡳ᠉
ᠸᠠᠯᡳᠶᠠᡴᡳ ᠰᡝᡵᡝ ᠣᠩᡤᠣᠯᠣ᠈ ᡠᡵᡠᠨᠠᡴᡡ ᠨᡝᠨᡝᠮᡝ ᠶᡝᠨᡩᡝᠮᠪᡳ᠉
ᡩᡠᡵᡳᡴᡳ ᠰᡝᡵᡝ ᠣᠩᡤᠣᠯᠣ᠈ ᡠᡵᡠᠨᠠᡴᡡ ᠨᡝᠨᡝᠮᡝ ᠪᡠᠮᠪᡳ᠉
ᡝᡵᡝᠪᡝ ᠨᠠᡵᡥᡡᠨ ᡤᡝᠩᡤᡳᠶᡝᠨ ᠰᡝᠮᠪᡳ᠉ ᡤᡝᠩᡤᡝᠨ ᡳ ᡤᠠᠩᡤᠠᠨ ᠪᡝ ᡝᡨᡝᡵᡝ᠈
ᠶᠠᡩᠠᠯᡳᠩᡤᡡ ᡳ ᡝᡨᡠᡥᡠᠨ ᠪᡝ ᡝᡨᡝᡵᡝ᠉ ᠨᡳᠮᠠᡥᠠ ᡨᡠᠩᡤᡠ ᡩᡝ ᠠᠯᠵᠠᠴᡳ ᠣᠵᠣᡵᠠᡴᡡ᠉
ᡤᡠᡵᡠᠨ ᡳ ᡨᡠᠰᠠᠩᡤᠠ ᡨᡝᡨᡠᠨ ᠪᡝ ᠨᡳᠶᠠᠯᠮᠠ ᡩᡝ ᡴᠣᠪᠴᡳᡥᡳᠶᠠᡩᠠᠴᡳ ᠣᠵᠣᡵᠠᡴᡡ᠉
ᡩᠣᡵᠣ ᡝᠨᡨᡝᡥᡝᠮᡝ ᠣᠴᡳ ᠶᠠᠪᡠᡵᡝ ᠪᡝ ᠠᡴᡡ ᠰᡝᠮᡝ᠈ ᠶᠠᠪᡠᡵᠠᡴᡡ ᠰᡝᡵᡝ ᠪᠠ ᠠᡴᡡ᠉
ᠸᠠᠩ ᡥᡝᠣ ᠠᡳᡴᠠ ᡨᡠᠸᠠᡴᡳᠶᠠᠮᡝ ᠮᡠᡨᡝᠴᡳ᠈ ᡨᡠᠮᡝᠨ ᠵᠠᡴᠠ ᡠᡨᡥᠠᡳ ᠪᡝᠶᡝᡳ ᠸᡝᠮᠪᡠᠮᠪᡳ᠉
ᠸᡝᠮᠪᡠᡶᡳ ᠪᡠᠶᡝᠨ ᠠᡵᠪᡠᡧᠠᠴᡳ᠈ ᠪᡳ ᡠᡨᡥᠠᡳ ᡤᡝᠪᡠ ᠠᡴᡡ ᡳ ᡤᡠᠯᡠ ᠪᡝ ᡴᠠᡩᠠᠯᠠᠮᠪᡳ᠉
ᡤᡝᠪᡠ ᠠᡴᡡ ᡳ ᡤᡠᠯᡠ ᡳᠨᡠ ᡠᡨᡥᠠᡳ ᠪᡠᠶᡝᠨ ᠠᡴᡡ᠉ ᠪᡠᠶᡝᠨ ᠠᡴᡡ ᠣᡶᡳ ᠴᡳᠪᠰᡝᡵᡝ ᠣᠴᡳ᠈