模板:MainPage/mnc-zh/section-plus3

From 语言维基
Jump to: navigation, search

本周經典閱讀

ᡤᠣᠯᠮᡳᠨ ᡧᠠᠩᡤᡳᠶᠠᠨ ᠠᠯᡳᠨ ᡩᡝᠨ ᠵᡠᠸᡝ ᡨᠠᠩᡤᡡ ᠪᠠ᠈ ᡧᡠᡵᡩᡝᠮᡝ ᠮᡳᠩᡤᠠᠨ ᠪᠠ᠉ ᡨᡝᡵᡝ ᠠᠯᡳᠨ  ᡳ ᠨᡳᠩᡤᡠ ᡩᡝ ᡨᠠᠮᡠᠨ  ᡳ ᡤᡝᠪᡠᠩᡤᡝ ᠣᠮᠣ ᠪᡳ᠈ ᡧᡠᡵᡩᡝᠮᡝ ᠵᠠᡴᡡᠨᠵᡠ ᠪᠠ᠉ ᡨᡝᡵᡝ ᠠᠯᡳᠨ ᠴᡳ ᡨᡠᠴᡳᡴᡝᠩᡤᡝ ᠶᠠᠯᡠ᠈ ᡥᡡᠨᡨᡠᠩ᠈ ᠠᡳᡥᡠ ᠰᡝᡵᡝ ᡳᠯᠠᠨ ᡤᡳᠶᠠᠩ᠉ ᠶᠠᠯᡠ ᡤᡳᠶᠠᠩ ᠠᠯᡳᠨ  ᡳ ᠵᡠᠯᡝᡵᡤᡳᠴᡳ ᡨᡠᠴᡳᡶᡳ ᠸᠠᠰᡳᡥᡡᠨ ᡝᠶᡝᡶᡳ ᠯᡳᠶᠣᠣᡩᡠᠩ ᡳ ᠵᡠᠯᡝᡵᡤᡳ ᠮᡝᡩᡝᡵᡳ ᡩᡝ ᡩᠣᠰᡳᡴᠠᠪᡳ᠉ ᡥᡡᠨᡨᡠᠩ ᡤᡳᠶᠠᠩ ᠠᠯᡳᠨ  ᡳ ᠠᠮᠠᡵᡤᡳᠴᡳ ᡨᡠᠴᡳᡶᡳ ᠠᠮᠠᠰᡳ ᡝᠶᡝᡶᡳ ᠠᠮᠠᡵᡤᡳ ᠮᡝᡩᡝᡵᡳ ᡩᡝ ᡩᠣᠰᡳᡴᠠᠪᡳ᠉ ᠠᡳᡥᡠ ᠪᡳᡵᠠ ᠸᡝᠰᡳᡥᡠᠨ ᡝᠶᡝᡶᡳ᠈ ᡩᡝᡵᡤᡳ ᠮᡝᡩᡝᡵᡳ ᡩᡝ ᡩᠣᠰᡳᡴᠠᠪᡳ᠉ ᡝᡵᡝ ᡳᠯᠠᠨ ᡤᡳᠶᠠᠩ ᡩᡝ ᠪᠣᠣᠪᠠᡳ ᡨᠠᠨᠠ᠈ ᡤᡝᠩᡤᡳᠶᡝᠨ ᠨᡳᠴᡠᡥᡝ ᡨᡠᠴᡳᠮᠪᡳ᠉ ᡧᠠᠩᡤᡳᠶᠠᠨ ᠠᠯᡳᠨ ᡝᡩᡠᠨ ᠮᠠᠩᡤᠠ᠈ ᠪᠠ ᡧᠠᡥᡡᡵᡠᠨ ᠣᡶᡳ᠉ ᠵᡠᠸᠠᡵᡳ ᡝᡵᡳᠨ ᠣᡥᠣ ᠮᠠᠩᡤᡳ᠈ ᡧᡠᡵᡩᡝᠮᡝ ᠠᠯᡳᠨ  ᡳ ᡤᡠᡵᡤᡠ ᡤᡝᠮᡠ ᡧᠠᠩᡤᡳᠶᠠᠨ ᠠᠯᡳᠨ ᡩᡝ ᡤᡝᠨᡝᡶᡳ ᠪᡳᠮᠪᡳ᠉ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᡠᡶᡠᡥᡠ ᠸᡝᡥᡝ ᠨᠣᡥᠣ ᡧᠠᠩᡤᡳᠶᠠᠨ ᠠᠯᡳᠨ ᡨᡝᡵᡝ ᡳᠨᡠ᠉

ᠮᠠᠨᠵᡠ ᡤᡠᡵᡠᠨ  ᡳ ᡩᠠ᠈ ᡤᠣᠯᠮᡳᠨ ᡧᠠᠩᡤᡳᠶᠠᠨ ᠠᠯᡳᠨ  ᡳ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᠪᡠᡴᡡᡵᡳ ᡤᡝᠪᡠᠩᡤᡝ ᠠᠯᡳᠨ᠈ ᠪᡠᠯᡥᡡᡵᡳ ᡤᡝᠪᡠᠩᡤᡝ ᠣᠮᠣᠴᡳ ᡨᡠᠴᡳᡴᡝ᠉ ᡨᡝᡵᡝ ᠪᡠᡴᡡᡵᡳ ᠠᠯᡳᠨ  ᡳ ᡩᠠᡩᡝ ᠪᡳᠰᡳᡵᡝ ᠪᡠᠯᡥᡡᡵᡳ ᠣᠮᠣᡩᡝ ᠠᠪᡴᠠᡳ ᠰᠠᡵᡤᠠᠨ ᠵᡠᡳ ᡝᠩᡤᡠᠯᡝᠨ᠈ ᠵᡝᠩᡤᡠᠯᡝᠨ᠈ ᡶᡝᡴᡠᠯᡝᠨ ᡳᠯᠠᠨ ᠨᠣᡶᡳ ᡝᠪᡳᡧᡝᠮᡝ ᠵᡳᡶᡳ ᠮᡠᡴᡝ ᠴᡳ ᡨᡠᠴᡳᡶᡳ ᡝᡨᡠᡴᡠ ᡝᡨᡠᡴᡳ ᠰᡝᡵᡝ ᡩᡝ᠈ ᡶᡳᠶᠠᠩᡤᡡ ᠰᠠᡵᡤᠠᠨ ᠵᡠᡳ ᡝᡨᡠᡴᡠᡳ ᡩᡝᠯᡝ ᡝᠨᡩᡠᡵᡳ ᠰᠠᡴᠰᠠᡥᠠ  ᡳ ᠰᡳᠨᡩᠠᡥᠠ ᡶᡠᠯᡤᡳᠶᠠᠨ ᡨᡠᠪᡳᡥᡝ ᠪᡝ ᠪᠠᡥᠠᡶᡳ ᠨᠠ ᡩᡝ ᠰᡳᠨᡩᠠᠴᡳ ᡥᠠᡳᡵᠠᠮᡝ ᠠᠩᡤᠠ ᡩᡝ ᠠᡧᡠᡶᡳ ᡝᡨᡠᡴᡠ ᡝᡨᡠᡵᡝ ᡩᡝ᠈ ᠠᡧᡠᡴᠠ ᡨᡠᠪᡳᡥᡝ ᠪᡳᠯᡥᠠ ᡩᡝ ᡧᡠᠸᡝ ᡩᠣᠰᡳᡶᡳ᠈ ᡤᠠᡳᡨᠠᡳ ᠠᠨᡩᠠᠨᡩᡝ ᠪᡝᠶᡝ ᡩᡝ ᠣᡶᡳ᠈ ᠸᡝᠰᡳᡥᡠᠨ ᡤᡝᠨᡝᠴᡳ ᠣᠵᠣᡵᠠᡴᡡ᠉ ᡥᡝᠨᡩᡠᠮᡝ᠈ ᠮᡳᠨᡳ ᠪᡝᠶᡝ ᡴᡠᡧᡠᠨ ᠣᡥᠣᠪᡳ᠈ ᠠᡩᠠᡵᠠᠮᡝ ᡨᡠᡨᠠᡵᠠ ᠰᡝᡥᡝ ᠮᠠᠩᡤᡳ᠈ ᠵᡠᠸᡝ ᡝᠶᡠᠨ ᡥᡝᠨᡩᡠᠮᡝ᠈ ᠮᡠᠰᡝ ᠯᡳᠩᡩᠠᠨ ᠣᡴᡨᠣ ᠵᡝᡴᡝᠪᡳᡥᡝ᠈ ᠪᡠᠴᡝᡵᡝ ᡴᠣᠣᠯᡳ ᠠᡴᡡ᠈ ᠰᡳᠨᡩᡝ ᡶᡠᠯᡳᠩᡤᠠ ᠪᡳᡶᡳ ᡴᡠᡧᡠᠨ ᠣᡥᠣᠪᡳᡩᡝᡵᡝ᠈ ᠪᡝᠶᡝ ᠸᡝᡳᡥᡠᡴᡠᠨ ᠣᡥᠣ ᠮᠠᠩᡤᡳ᠈ ᠵᡳᠣ ᠰᡝᠮᡝ ᡥᡝᠨᡩᡠᡶᡳ ᡤᡝᠨᡝᡥᡝ᠉ ᡶᡝᡴᡠᠯᡝᠨ ᡨᡝᡵᡝᠴᡳ ᡠᡨᡥᠠᡳ ᡥᠠᡥᠠ ᠵᡠᡳ ᠪᠠᠨᠵᡳᡥᠠ᠈ ᠠᠪᡴᠠ  ᡳ ᡶᡠᠯᡳᠩᡤᠠᡳ ᠪᠠᠨᠵᡳᠪᡠᡥᠠ ᠵᡠᡳ ᠣᡶᡳ ᡠᡨᡥᠠᡳ ᡤᡳᠰᡠᡵᡝᠮᠪᡳ᠈ ᡤᠣᡳᡩᠠᡥᠠ ᠠᡴᡡ ᠠᠮᠪᠠᡴᠠᠨ ᠣᡥᠣ ᠮᠠᠩᡤᡳ ᡝᠮᡝ ᡥᡝᠨᡩᡠᠮᡝ᠈ ᠵᡠᡳ ᠰᡳᠮᠪᡝ ᠠᠪᡴᠠ ᡶᠠᠴᡠᡥᡡᠨ ᡤᡠᡵᡠᠨ ᠪᡝ ᡩᠠᠰᠠᠮᡝ ᠪᠠᠨᠵᡳᡴᡳᠨᡳ ᠰᡝᠮᡝ ᠪᠠᠨᠵᡳᠪᡠᡥᠠᠪᡳ᠈ ᠰᡳ ᡤᡝᠨᡝᡶᡳ ᡶᠠᠴᡠᡥᡡᠨ ᡤᡠᡵᡠᠨ ᠪᡝ ᡩᠠᠰᠠᠮᡝ ᡨᠣᡴᡨᠣᠪᡠᠮᡝ ᠪᠠᠨᠵᡳ ᠰᡝᠮᡝ ᡥᡝᠨᡩᡠᡶᡳ ᠠᠪᡴᠠ  ᡳ ᡶᡠᠯᡳᠩᡤᠠᡳ ᠪᠠᠨᠵᡳᠪᡠᡥᠠ ᡨᡠᡵᡤᡠᠨ ᠪᡝ ᡤᡳᠶᠠᠨ ᡤᡳᠶᠠᠨ  ᡳ ᡨᠠᠴᡳᠪᡠᡶᡳ ᠸᡝᡳᡥᡠ ᠪᡠᡶᡳ ᡝᡵᡝ ᠪᡳᡵᠠ ᠪᡝ ᠸᠠᠰᡳᠮᡝ ᡤᡝᠨᡝ ᠰᡝᡶᡳ᠈ ᡝᠮᡝ ᡠᡨᡥᠠᡳ ᠠᠪᡴᠠ ᡩᡝ ᠸᡝᠰᡳᡴᡝ᠉